(ក្រុងឡុងដ៍)៖ ខ្សែប្រយុទ្ធ Raphinha របស់ក្លិប Leeds United ជិតឈានដល់ការផ្លាស់ទៅកាន់ក្លិបអេស្ប៉ាញ FC Barcelona ដែលនេះជាការបញ្ជាក់ពីគ្រូបង្វឹក លោក Jesse Marsch ដែលអាចនឹងមានតម្លៃប្រមាណ ៤៩លានផោន។ នេះបើតាមប្រភព BBC បានឲ្យដឹងនាថ្ងៃទី១៣ ខែកក្កដា ឆ្នាំ២០២២។

ខ្សែប្រយុទ្ធសញ្ជាតិប្រេស៊ីល វ័យ ២៥ឆ្នាំ Raphinha ត្រូវបាន Leeds ទិញមកពីក្លិប Rennes កាលឆ្នាំ២០២០ ដោយមកដល់ពេលនេះលេងបាន ៦៥ប្រកួត និងរកបាន ១៧គ្រាប់ និងបញ្ជូនបាល់ឲ្យមិត្តរួមក្រុមស៊ុតបញ្ចូលទីបានសម្រេចចំនួន ១២លើក។

Raphinha កំពុងមានកិច្ចសន្យាជាមួយក្លិប Leeds រយៈពេល ១ឆ្នាំទៀត ដ្បិតរូបគេក៏ធ្លាប់មានរបាយការណ៍ថា មានការចាប់អារម្មណ៍ទៅកាន់ក្លិប Chelsea មុនក្លិបលេងនៅ La Liga ធ្វើការទាក់ទងមក ដោយលោក Jesse Marsch បានបង្ហាញថា «នេះជាក្តីស្រមៃរបស់គាត់ ដោយខ្ញុំសង្ឃឹមថា គាត់នឹងទទួលបានការសម្រេចកិច្ចព្រមព្រៀងនេះ»៕