(បរទេស)៖ តារាចម្រៀងល្បីឈ្មោះរបស់អង់គ្លេសលោក Ed Sheeran ត្រូវបានរាយការណ៍មកថា នឹងឡើងតទល់ក្តីក្នុងសវនាការជុំវិញបណ្តឹង ដែលមានតម្លៃជាទឹកប្រាក់ចំនួន១០០លានដុល្លារ ខណៈបណ្តឹងនេះបានកើតមានឡើង បន្ទាប់ពីមានការទាមទារថា ស្នាដៃចម្រៀងរបសលោក ដែលផ្ទុះខ្លាំងកាលពីឆ្នាំ២០១៤ ចំណងជើងថា «Thinking Out Loud» បានចម្លងចេញពីបទរបស់តារាចម្រៀង Marvin Gate ចំណងជើងថា «Let's Get It On»។ បច្ចុប្បន្នចៅក្រមសហព័ន្ធក្នុងតំបន់ Manhattan បានច្រានចោលកិច្ចខិតខំប្រឹងប្រែងរបស់តារាចម្រៀងវ័យ៣១ឆ្នាំរូបនេះ និងបញ្ចូនសំណុំរឿងទៅកាត់ក្តីបន្តនាពេលខាងមុខ។ នេះបើតាមការចេញផ្សាយដោយសារព័ត៌មាន msn នាពេលថ្មីៗនេះ។
បើយោងតាមចៅក្រមរបស់តារាចម្រៀង Ed Sheeran ពាក្យបណ្តឹងដែលបានចោទប្រកាន់ទៅលើតារារូបនេះ គឺគ្មានមូលដ្ឋានច្បាប់ត្រឹមត្រូវឡើយ ព្រោះធាតុផ្សំដែលស្រដៀងគ្នារវាងបទចម្រៀងទាំងពីរមិនមានភាព «Unique» ដែលត្រូវបានគ្របដណ្តប់នៅក្រោមច្បាប់ កម្មសិទ្ធបញ្ញា។ ទោះជាយ៉ាងណាក៏ដោយ ចៅក្រមនៅសហរដ្ឋអាមេរិកបាននិយាយថា តារាចម្រៀង Sheeran ត្រូវតែប្រឈមនឹងគណៈវិនិច្ឆ័យ ដើម្បីដោះស្រាយបន្តទៀត។
ទោះជាបែបនេះក្តី គេមិនទាន់ដឹងឡើយថាតើ រឿងក្តីរបស់តារាចម្រៀង Ed Sheeran ខាងលើនេះទៅជាយ៉ាងណា ខណៈកាលបរិច្ឆេទនៃការឡើងសវនាការគឺនៅមិនទាន់កំណត់ពេលនៅឡើយ៕