(ភ្នំពេញ)៖ ការប្រកួតបាល់ទាត់ពានរង្វាន់លីគកំពូលកម្ពុជា ប្រចាំសប្តាហ៍ទី២០ ត្រូវបានបញ្ចប់ហេីយ ដោយមានក្រុមភ្នំពេញក្រោន រកបាន ៣ពិន្ទុបន្ថែមទៀត ក្រោយយកឈ្នះម្ចាស់ផ្ទះណាហ្គា ដោយលទ្ធផល ២-០ នៅកីឡដ្ឋានខេត្តកំពង់ស្ពឺ ដើម្បីបញ្ចប់ក្នុងតំណែង Top-4 ប្រជែងពានលីគជាបន្តទៀត។
ទាក់ទងទៅនឹងការប្រកួតរបស់ក្រុមទាំងពីរលេងក្នុងតង់ទី១ ក្រុមភ្ញៀវភ្នំពេញក្រោនបាននាំមុខមុន ១គ្រាប់ និងស៊ុតបញ្ជូលទីដោយកីឡាករ FAREED SADAT ពាក់លេខ១៩ នាទីទី៤៥+២ និងឈានដល់តង់ទី២ ក្រោន រកបាន ១គ្រាប់ទៀត និងបានទាត់បញ្ចូលទីដោយកីឡាករ CHHOM SOKHAY ពាក់លេខ២៤ នៅនាទីទី៦៣ ធ្វើឲ្យក្រុមទទួលបានជ័យជម្នះតែម្តង។
នេះមានន័យថា ភ្នំពេញក្រោនដែលជាអតីតជើងឯកលីគកំពូលកម្ពុជា ៦សម័យកាលផងនោះ បានចូលរួមជាមួយ បឹងកេត វិសាខា និងក្រុមកំពូលតារាងព្រះខ័នរាជស្វាយរៀង ក្នុងការប្រជែងពានលីគ CPL 2022 ជាបន្តទៀត ក្នុងចំណោម ៤ក្រុមដែលត្រូវប្រកួត ២ជើងបន្ថែមទៀត ដ្បិតណាហ្គា អស់ឱកាសដែលបញ្ចប់ក្នុងចំណាត់ថ្នាក់លេខ៥ នោះ។
ការប្រកួត ២ជើង ដើម្បីស្វែងរកជើងឯកនោះ នឹងយកពិន្ទុទៅបូកជាមួយពិន្ទុក្នុងជើងទី១ និងជើងទី២ ទៀតដែរ គ្រាដែលក្រុមមានពិន្ទុខ្ពស់ជាងគេ នឹងទទួលបានជើងឯកតែម្តង៕
