(ដូហា)៖ ក្រុមហ៊ុនអាកាសចរណ៍ Qatar Airways នឹងដកចេញនូវជើងហោះហើរមកពី ១៨គោលដៅ ដើម្បីទុកកន្លែងនៅឯអាកាសយានដ្ឋាន Hamad International Airport សម្រាប់ក្រុមហ៊ុនអាកាសចរណ៍ ដឹកអ្នកគាំទ្រមកចូលរួមក្នុងព្រឹត្តិការណ៍បាល់ទាត់ពិភពលោក World Cup នៅខែក្រោយ។ នេះបើតាមការបញ្ជាក់ពី CEO របស់ក្រុមហ៊ុន ហើយត្រូវបានចុះផ្សាយដោយសារព័ត៌មាន CNA នាថ្ងៃទី១៩ ខែតុលា ឆ្នាំ២០២២។

នាយកប្រតិបត្តិ Akbar Al Baker របស់ក្រុមហ៊ុន Qatar Airways បានលើកឡើងថា អាទិភាពនាពេលនេះ គឺសម្រាប់ជើងហោះហើររាប់រយដែលនឹងចុះចត នៅក្នុងប្រទេសសម្រាប់ព្រឹត្តិការណ៍បាល់ទាត់។

កាតា ដែលត្រូវបានគេរំពឹងថា នឹងមានជើងហោះហើរចូល និងចេញប្រមាណ ៥០០ជើង​ក្នុង ១ថ្ងៃ ព្រមទាំងមានជើងហោះហើរពិសេស និងយន្តហោះឯកជននោះ នឹងធ្វើជាម្ចាស់ផ្ទះព្រឹត្តិការណ៍ប្រកួតបាល់ទាត់លំដាប់ពិភពលោកនេះចាប់ពីថ្ងៃទី២០ ខែវិច្ឆិកា ដល់ថ្ងៃទី១៨ ខែធ្នូ ជាមួយនឹងអ្នកទស្សនាប្រមាណ ១.២លាននាក់។

ក្រុមបាល់ទាត់សរុបមកពី ៣២ប្រទេស នឹងចូលរួមការប្រកួតនៅទូទាំង ៨កីឡដ្ឋានដែលមានចម្ងាយប្រមាណ ៤០គីឡូម៉ែត្រជុំវិញទីក្រុង Doha៕