(អេមស្ទឺដេម)៖ រដ្ឋាភិបាលហូឡង់ បានបញ្ជាក់នៅថ្ងៃពុធថា ខ្លួននឹងបញ្ជូនគណៈប្រតិភូមួយក្រុមទៅចូលរួមក្នុងព្រឹត្តិការណ៍ World Cup នៅប្រទេសកាតា នាខែវិច្ឆិកាខាងមុខ បើទោះបីជាការបោះឆ្នោតសភាមួយបានជំរុញឲ្យខ្លួនមិនធ្វើដូច្នេះនោះទេ ដោយសារតែមានការព្រួយបារម្ភ លើការប្រព្រឹត្តរបស់ប្រទេសនៅតំបន់ឈូងសមុទ្រ Gulf មួយនេះទៅលើក្រុមពលករចំណាកស្រុក។ នេះបើយោងតាមសារព័ត៌មាន CNA ចេញផ្សាយនាថ្ងៃទី២០ ខែតុលា ឆ្នាំ២០២២។

កាតា ជាទីកន្លែងពោរពេញដោយកម្មករ និងជនបរទេសមានចំនួនភាគច្រើន នៃអត្រាប្រជាជន ២.៨លាននាក់នោះ បានស្ថិតក្រោមការត្រួតពិនិត្យយ៉ាងខ្លាំង ពីសំណាក់ក្រុមសិទ្ធិមនុស្សពាក់ព័ន្ធនឹងបញ្ហាជនចំណាកស្រុក ខណៈព្រឹត្តិការណ៍ World Cup នឹងចាប់ផ្តើមនៅថ្ងៃទី២០ ខែវិច្ឆិកាខាងមុខ។

«គណៈរដ្ឋមន្ត្រី នឹងបញ្ជូនប្រតិភូរដ្ឋាភិបាលមួយក្រុមដូចធម្មតា នៅឯព្រឹត្តិការណ៍កីឡាធំៗ» នេះបើតាមសម្តីរដ្ឋមន្ត្រីការបរទេសហូឡង់ លោក Wopke Hoekstra និងរដ្ឋមន្ត្រីកីឡា លោកស្រី Conny Helder បានលើកឡើងក្នុងលិខិតរួមគ្នាមួយដែលផ្ញើទៅកាន់សភា។ «យើងជ្រើសរើសកិច្ចសហប្រតិបត្តិការជាមួយកាតា ជាមួយនឹងទស្សនៈដើម្បីផ្លាស់ប្តូរនិរន្តរភាព»៕