(ភ្នំពេញ)៖ ក្រុមបាល់ទះជម្រើសជាតិកម្ពុជា នឹងត្រូវប្រកួតមិត្តភាពអន្ដរជាតផ្លូវការ ជាមួយក្រុមជម្រើសជាតិគុយបា នាម៉ោង ៧យប់នេះ នៅកីឡដ្ឋានព្រីនស៍ បន្ទាប់ពីក្រុមទាំងពីរ បានប្រកួតកម្ដៅសាច់ដុំក្រៅផ្លូវការចំនួន ២ប្រកួតដោយកម្ពុជា សុទ្ធតែទទួលជ័យជម្នះ។
ក្រុមជម្រើសជាតិគុយបា បានធ្វើដំណើរមកដល់កម្ពុជា កាលពីថ្ងៃអាទិត្យកន្លងទៅ ហើយនៅថ្ងៃទី១៨-១៩ ខែតុលានេះ គុបាយ ក៏បានធ្វើការប្រកួតសមដៃជាមួយម្ចាស់ផ្ទះកម្ពុជាចំនួន ២ប្រកួត មុនឈានដល់ការប្រកួតមិត្តភាពផ្លូវការយប់នេះ។ ជាលទ្ធផលការប្រកួតក្រៅផ្លូវការនោះ កម្ពុជា បានយកឈ្នះគុយបា ក្នុងលទ្ធផល ៣-២សិត ដូចគ្នា។
នេះគឺជាជំនួបមិត្តភាពអន្ដរជាតិផ្លូវការ លើកទី២ របស់ក្រុមជម្រើសជាតិកម្ពុជា ក្រោយការដណ្ដើមបានមេដាយសំរឹទ្ធជាប្រវត្តិសាស្ដ្រ ក្នុងស៊ីហ្គេម លើកទី៣១ បន្ទាប់ពីកម្ពុជា បានយកឈ្នះក្រុមជម្រើសជាតិសិង្ហបុរី ដោយលទ្ធផល ២-១សិត ក្នុងជំនួបអបអរសាទរពិធីបើកការប្រកួតពានរង្វាន់សម្ដេចតេជោ ហ៊ុន សែន ឆ្នាំ២០២២ កាលពីថ្ងៃទី១៥ ខែតុលាកន្លងទៅ។
លោកបណ្ឌិត អាំង សិរីពិសិដ្ឋ អគ្គលេខាធិការសហព័ន្ធកីឡាបាល់ទះកម្ពុជា បានចាត់ទុកការប្រកួតមិត្តភាពអន្ដរជាតិទាំងពីរនេះ គឺជាការប្រកួតដ៏សំខាន់ សម្រាប់ក្រុមជម្រើសជាតិកម្ពុជា ធ្វើការវាស់ស្ទង់សមត្ថភាព ពិសេសផ្ដល់ឱកាសដល់កីឡាករថ្មីៗ ដើម្បីពង្រឹងសមត្ថភាព បច្ចេកទេស និងគុណផលកីឡា ត្រៀមការប្រកួតកីឡាស៊ីហ្គេម ឆ្នាំ២០២៣ ដែលកម្ពុជាធ្វើម្ចាស់ផ្ទះ៕
