(មេនឆេស្ទើ)៖ កីឡាករ Fred និង Bruno Fernandes រកបានម្នាក់ ១គ្រាប់ក្នុងជ័យជម្នះ ២ទល់នឹង០ របស់បិសាចក្រហម Manchester United ទៅលើគូប្រជែង Tottenham Hotspur ក្នុងលីគកំពូលអង់គ្លេស Premier League នៅរាត្រីឆ្លងចូលថ្ងៃព្រហស្បតិ៍ ទី២០ ខែតុលា ឆ្នាំ២០២២ (ម៉ោងនៅកម្ពុជា)។

ក្រុមមានមូលដ្ឋាននៅទីក្រុង Manchester ហាក់មានទម្រង់លេងល្អឡើងវិញ ស្ថិតក្រោមការបង្វឹករបស់លោក Erik ten Hag តាមរយៈយកឈ្នះក្រុមខ្លាំងមាន់ខ្នាយមាស Spurs នៅទឹកដី Old Trafford នៅពេលកីឡាករចាំទី Hugo Lloris បានធ្វើការសង្រ្គោះបាល់ ៥លើកក្នុងវគ្គទី១ ពីការដាក់សម្ពាធនៃក្រុមម្ចស់ផ្ទះ។

ជាចុងក្រោយ Fred ក៏រកបានគ្រាប់បែកពងមាន់ដដែល ត្រឹមចាប់ផ្តើមលេងវគ្គទី២ បាន ២នាទីប៉ុណ្ណោះ និង United ត្រូវរង់ចាំដល់នាទី៦៩ ទើបមានគ្រាប់ទី២ កើតឡើងទៀតពីការធ្វើបានសម្រេចដោយ Bruno Fernandes ដើម្បីធានាបាន ៣ពិន្ទុក្នុងសប្តាហ៍ទី១១ ជើងទី១ នេះ។

តាមរយៈជ័យជម្នះនេះដែរ បានធ្វើឲ្យ United បន្តឈរនៅលេខរៀងទី៥ ជាបណ្តោះអាសន្នក្នុងតារាង Premier League ដដែល ដោយចាញ់ ៨ពិន្ទុពីក្រុមកំពូលតារាង Arsenal គ្រាដែល Spurs ដែលដឹកនាំដោយលោក Antonio Conte ខកខានឡើងទៅឈរលេខ២ ពីលើក្រុមការពារតំណែងជើងឯក Manchester City៕