(ឡាវ)៖ ដើម្បីជាផ្នែកមួយនៃការបន្តពង្រីកមុខមាត់ Starbucks នៅទូទាំងអាស៊ីអាគ្នេយ៍ Coffee Concepts Limited ដែលជាក្រុមហ៊ុនបុត្រសម្ព័ន្ធរបស់ Maxim’s Caterers Limited នាថ្ងៃទី៣ ខែវិច្ឆិកា ឆ្នាំ២០២២នេះ បានបើកទីតាំង Starbucks ដំបូងគេនៅក្នុងប្រទេសឡាវ ដែលជាប្រទេសទី១៥ របស់ Starbucks ដែលមានវត្តមានក្នុងតំបន់អាស៊ីប៉ាស៊ីហ្វិក និងប្រទេសទី៨៤ នៅទីផ្សារពិភពលោក។ ការបើកហាងនេះ បានបញ្ជាក់ជាថ្មីពីការប្តេជ្ញាចិត្តរយៈពេលវែងរបស់ Starbucks ក្នុងការបន្តរីកចម្រើននៅទូទាំងអាស៊ីជាមួយនឹងសាខាជាង ១២០០០នៅក្នុងតំបន់ ។
លោកស្រី Emmy Kan ដែលជាអនុប្រធានជាន់ខ្ពស់ និងជាប្រធានប្រចាំតំបន់អាស៊ីប៉ាស៊ីហ្វិកបានឱ្យដឹងថា យើងពិតជារំភើបក្នុងការឈានដល់ដំណាក់កាល ដែលរំពឹងទុកខ្ពស់នៃការបើកហាងដំបូងរបស់យើងនៅក្នុងប្រទេសឡាវ។ ដោយបានដំណើរការនៅអាស៊ីអាគ្នេយ៍អស់រយៈពេលជាង ២៥ឆ្នាំ យើងមានកិត្តិយសក្នុងការស្វាគមន៍ដៃគូឆុងកាហ្វេថ្មីបំផុតនៅក្នុងប្រទេសឡាវ ដើម្បីចូលរួមក្នុងការនាំយកបទពិសោធន៍ Starbucks ដែលមិនអាចប្រៀបផ្ទឹមបាន ជូនដល់អតិថិជនក្នុងស្រុកតាមរយៈការរចនាហាងដ៏ប្រណិត ភេសជ្ជៈធ្វើឡើងដោយផ្ចិតផ្ចង់ និងបទពិសោធន៍កាហ្វេដែលប្រកបដោយការគំនិតច្នៃប្រឌិតនិងបរិយាកាសដ៏ទាក់ទាញ ។
ហាង Starbucks នៅក្នុងប្រទេសឡាវនឹងដំណើរការជាមួយដៃគូ ដែលមានអាជ្ញាប័ណ្ណរបស់ខ្លួនគឺ Coffee Concepts Limited ដែលជាសាខារបស់ Maxim’s Caterers Limited ។ តាមរយៈ Coffee Concepts Limited យីហោ Starbucks មានហាងជាង ៩០០ នៅទូទាំងតំបន់ដូចជា ហុងកុង និងម៉ាកាវ ប្រទេសវៀតណាម ប្រទេសកម្ពុជា ប្រទេសសិង្ហបុរី និងប្រទេសថៃ។
លោក Michael Wu ដែលជាប្រធាន និងនាយកគ្រប់គ្រងនៃ Hong Kong Maxim’s Group បានឱ្យដឹងដែរថា ស្របពេលដែលយើងប្រារព្ធសម្ពោធហាងដំបូងបង្អស់នៅក្នុងប្រទេសឡាវ យើងនឹងប្តេជ្ញាចិត្តក្នុងការផ្តល់នូវបទពិសោធន៍ដ៏ល្អបំផុតជូនដល់ដៃគូ និងអតិថិជននៅក្នុងទីផ្សារហើយនឹងបន្តរីកចម្រើននៅក្នុងប្រទេសឡាវតទៅទៀត ដើម្បីបន្តផ្តល់ឱកាសឱ្យដៃគូឆុងកាហ្វេប្រាស្រ័យទាក់ទងកាន់តែជិតស្និទ្ធិជាមួយអតិថិជន ក្នុងពេលអនាគត។ ជាទឹកដីដែលមានប្រវត្តិទាក់ទងនឹងការផលិតកាហ្វេដ៏ល្បីល្បាញ ឡាវជាទីផ្សារដែលមានវប្បធម៌កាហ្វេដ៏សម្បូរបែបមួយ ។ ហាងថ្មីនេះនឹងផ្តល់ជូននូវបទពិសោធន៍កាន់តែពិសេសបន្ថែមទៀត ជាមួយនឹងបរិយាកាសហាងកាហ្វេដ៏កក់ក្តៅ រួមជាមួយនឹងភេសជ្ជៈដ៏ផ្ចិតផ្ចង់ប្រចាំ Starbucks ។
ហាងនេះត្រូវបានរចនាឡើងដើម្បីភាពស៊ីសង្វាក់គ្នារវាងស្ថាបត្យកម្មរបស់ប្រទេសឡាវ និងកេរ្តិ៍ដំណែលកាហ្វេ Starbucks ដើម្បីនាំយកបទពិសោធន៍កាហ្វេជូនដល់អតិថិជនគ្រប់រូប ។ រចនាម៉ូដដៃទ្វារដែលឆ្លាក់ដោយដៃផ្តល់នូវអារម្មណ៍ស្វាគមន៍ដល់អតិថិជនចាប់តាំងពីពេលដែលពួកគេបើកទ្វារចូលហាងមក ។ ពិដាននៃហាងទាំងមូលត្រូវបានគ្របដណ្ដប់ដោយក្បឿងឈើក្បាច់ស្រកាត្រីមច្ឆា Siren តម្រៀបជាជួរតាម ក្បាច់ដំបូលលំនៅដ្ឋានបុរាណទូទៅក្នុងប្រទេសឡាវ ។ ក្បឿងពិដានត្រូវបានតុបតែងដោយសិប្បកម្មឈើបែបរុក្ខសាស្ត្រ ដែលត្រូវបានបំផុសគំនិតដោយរុក្ខជាតិកាហ្វេ និងទេសភាពធម្មជាតិនៃប្រទេសឡាវ បង្កើតបានជាកន្លែងទទួលស្វាគមន៍ និងជាកន្លែងទីបីសម្រាប់អតិថិជនបន្ទាប់ពីផ្ទះ និងកន្លែងធ្វើការរបស់ពួកគាត់។
ហាងនេះបង្កើតឡើងតាមបែបផែនរបស់ Starbucks ដើម្បីចែករំលែកបទពិសោធន៍ Starbucks ដល់ដៃគូ និងអតិថិជនក្នុងស្រុករបស់ខ្លួន ដោយផ្តល់តម្លៃខ្ពស់ដល់វប្បធម៌ អរិយធម៌ សិល្បៈដ៏ផូរផង់របស់ប្រទេសឡាវ ។ គំនូរមច្ឆា Siren ដ៏ស្រស់ស្អាតកាន់មែកកាហ្វេ សម្លឹងទៅមុខយ៉ាងក្លាហាន នៅលើជញ្ជាំងត្រូវបានគូរឡើងដ៏ប្រណិតដោយវិចិត្រករក្នុងស្រុក ។ រីឯបារឆុងកាហ្វេមានទីតាំងនៅ
ចំកណ្តាលហាង ធ្វើឱ្យទំនាក់ទំនងអតិថិជនជាចំនុចសំខាន់បទពិសោធន៍កាហ្វេមួយនេះ។ ដើម្បីអបអរសាទរការមកដល់ហាងនៅប្រទេសឡាវ អតិថិជន Starbucks ៣០០ នាក់ដំបូងដែលមកហាងកាហ្វេនេះ នឹងទទួលបានកែវភេសជ្ជៈអនុស្សាវរីយមានកំណត់ដោយឥតគិតថ្លៃ និង Starbucks Bearista® Bear មួយក្រោយពេលជាវភេសជ្ជៈទំហំ Grande ឬ Venti ។
ក្រោមការពង្រីកទីតាំងបន្ថែមក្នុងប្រទេសឡាវនេះStarbucks បានប្តេជ្ញាចិត្តក្នុងការពង្រឹងស្តង់ដាររបស់ខ្លួនឱ្យបានល្អ និងចែករំលែកទង្វើវិជ្ជមាននៅក្នុងគ្រប់សហគមន៍ដែលខ្លួនមានវត្តមាន ។ ជាមួយនឹងមគ្គុទ្ទេសក៍ Mission and Values, របស់ខ្លួន Starbucks បានប្តេជ្ញាក្នុងការ ទាក់ទាញ និងរក្សាក្រុមដៃគូឈានមុខក្នុងឧស្សាហកម្មនេះ និងបង្កើតឱកាសដើម្បីអភិវឌ្ឍវិស័យការងារនៅក្នុងឧស្សាហកម្មកាហ្វេនេះ ឱ្យបានកាន់តែប្រសើរឡើង ។ សម្រាប់ទីផ្សារក្នុងទ្វីបអាស៊ីទាំងមូល រួមទាំងប្រទេសចិន និងជប៉ុន Starbucks សព្វថ្ងៃនេះដំណើរការហាងជាង ១០,០០០ និងមានបុគ្គលិកជាង ១៤៩,០០០ (បុគ្គលិក) ដែលមានមោទនភាពក្នុងពាក់អៀមបៃតងរបស់យើង៕