(កូរ៉េ)៖ មានការព្យាករណ៍ថាប្រាក់ចំណេញរបស់ HYBE នៅឆ្នាំ ២០២៣ នឹងយ៉ាប់យ៉ឺនជាងឆ្នាំនេះ ដោយសារសមាជិក BTS នឹងត្រូវចូលបំពេញកាតព្វកិច្ចយោធាបន្តបន្ទាប់។ ប៉ុន្តែ HYBE សង្ឃឹមថាក្រុមហ៊ុននឹងអាចទាញយកប្រាក់ចំណេញរបស់ខ្លួន ចាប់ពីឆ្នាំក្រោយជាមួយនឹងការធ្វើឲ្យប្រសើរឡើង នូវការសម្តែងរបស់ក្រុម និងសិល្បករផ្សេងទៀត។ នេះបើតាមការចេញផ្សាយរបស់សារព័ត៌មាន All K-POP នៅថ្ងៃទី០៤ ខែវិច្ឆិកា ឆ្នាំ២០២២។
ជាក់ស្តែងនៅថ្ងៃទី០៣ ខែតុលា ម្សិលមិញនេះ នាយកប្រតិបត្តិរបស់ក្រុមហ៊ុន HYBE លោក Park Ji Won បាននិយាយនៅក្នុងសន្និសីទមួយ ស្តីពីការប្រកាសប្រាក់ចំណូលនៅត្រីមាសទី៣ ដោយលោកបានបញ្ជាក់ថា សមាមាត្រនៃការលក់របស់ (HYBE) គឺ BTS នៅ ៦០-៦៥ភាគរយ ហើយតារាផ្សេងទៀត គឺប្រហែល ៣៥-៤០ភាគរយ»។
នាយកប្រតិបត្តិរូបនេះ ក៏បានធ្វើការព្យាករណ៍ថា «ឆ្នាំនេះយើងនឹងអាចទទួលបានប្រាក់ចំណេញប្រតិបត្តិការពាក់កណ្តាល ១០ភាគរយ ដោយសារតែការងារផ្សេងរបស់ BTS»។ ប្រាក់ចំណេញប្រតិបត្តិការរបស់ HYBE នៅក្នុងឆមាសទីមួយនៃឆ្នាំនេះគឺ ១៥,៧ភាគរយ។ ដោយសារ Jin ជាសមាជិកដែលមានអាយុច្រើនជាងគេក្នុងក្រុម BTS ដូច្នេះតាមគម្រោង គឺលោកត្រូវចូលបម្រើទ័ពនៅចុងឆ្នាំនេះ ឬដើមឆ្នាំក្រោយ ជាហេតុម្ចាស់ភាគហ៊ុនមួយចំនួន ហាក់មានសម្ពាធ និងគិតថាស្ថានភាពអាចនឹងពិបាកនៅឆ្នាំក្រោយ។
គួរជម្រាបថា សមាជិក BTS នឹងបន្តចេញអាល់ប៊ុមទោល បន្ទាប់ពី J-Hope, Jin និង Leader RM (ដែលគ្រោងចេញអាល់ប៊ុមនៅក្នុងពេលឆាប់ៗ)។ ដូច្នេះ Suga, Jimin, V និង Jungkook ក៏នឹងគ្រោងចេញអាល់ប៊ុមម្ដងម្នាក់ ជាបន្តបន្ទាប់នៅឆ្នាំក្រោយ។ HYBE ក៏បានបញ្ជាក់ដែរថា ក្រុមនឹងវិលជុំគ្នាវិញជាប្រាកដនៅឆ្នាំ ២០២៥ ពោលគឺនៅពេលពួកគេបញ្ចប់ កាតព្វកិច្ចពីជួរកងទ័ពចប់សព្វគ្រប់៕
