(ដូហា)៖ ក្រុមជម្រើសជាតិអេស្ប៉ាញ បានយកឈ្នះក្រុមកូស្តារីកា ៧-០ នៃវគ្គសន្សំពិន្ទុក្នុងពូល E (លើកទី១) ក្នុងការប្រកួតព្រឹត្តិការណ៍ FIFA World Cup 2022 ដែលពួកគេរកបាន ៣ពិន្ទុស្មើជាមួយក្រុមជប៉ុន ឈរកំពូលតារាងជាបណ្តោះអាសន្ន។
តង់ទី១ ការប្រកួតបានត្រឹម ១១នាទីក្នុងកីឡដ្ឋាន Al Thumama ក្រុមអេស្ប៉ាញ រកបាន ១គ្រាប់ដោយការស៊ុតរបស់កីឡាករ Dani Olmo ហើយមិត្តរួមក្រុម Marco Asensio បន្តរកបាននៅនាទី២១ ពេលដែលកីឡាករ Ferran Torres ស៊ុតបានគ្រាប់ទី៣ ដោយបាល់ពិន័យ ១១ម៉ែត្របានសម្រេចនៅនាទី៣១។
ចូលតង់ទី២ ក្រុមអេស្ប៉ាញ ដែលដឹកនាំដោយលោក Luis Enrique នៅតែបន្តរកបានគ្រាប់ស៊ុតបញ្ចូលទីពីសំណាក់កីឡាករ Ferran Torres នៅនាទី៥៤ និងកីឡាករវ័យក្មេង Gavi រកបាននៅនាទី៧៥ ខណៈដែលកីឡាករ Carlos Soler ធ្វើបាននៅនាទី៩០ ពេលដែលខ្សែប្រយុទ្ធ Alvaro Morata រកបាននៅនាទី៩០ +៣។
សូមបញ្ជាក់ផងថា ប្រកួតលើកទី២ ស្ថិតក្នុងពូល E វគ្គចែកពូលសន្សំពិន្ទុ ក្រុមអេស្ប៉ាញ បន្តជួបក្រុមអាល្លឺម៉ង់ នៅថ្ងៃទី២៨ ខែវិច្ឆិកានេះ ក្រោយពេលក្រុមជប៉ុន ប៉ះក្រុមកូស្តារីកា នាថ្ងៃទី២៧ ខែដដែល ឆ្នាំ២០២២នេះ នៃការប្រជែងដណ្តើម ៣ពិន្ទុយ៉ាងសំខាន់ជាបន្តទៀត៕