(បរទេស)៖ តារាចម្រៀង និងតារាសម្ដែងអាមេរិក Selena Gomez និងក្រុមចម្រៀងស្រី K-pop Blackpink ដែលសហការគ្នាពីចម្ងាយ លើការផលិតបទ ចម្រៀង «Ice Cream» ឆ្នាំ២០២០ អំឡុងពេលជំងឺរាតត្បាតនោះ ទីបំផុតបានជួបគ្នាផ្ទាល់ហើយនាពេលថ្មីៗនេះ។ នេះបើតាមការចេញផ្សាយរបស់សារព័ត៌មាន Straits Times នៅថ្ងៃទី២៨ ខែវិច្ឆិកា ឆ្នាំ២០២២។
Gomez អាយុ៣០ឆ្នាំ បានបង្ហោះរូបថតចំនួន៣សន្លឹក នៅលើ Instagram របស់ខ្លួន កាលពីចុងសប្តាហ៍កន្លងទ ជាមួយក្រុមនារី BLACKPINK ដែលទើបតែបានបញ្ចប់ការប្រគំតន្ត្រីទេសចរណ៍ពិភពលោករបស់ពួកគេនៅអាមេរិក។ Selena Gomez និងក្រុម BLACKPINK ត្រូវបានគេដឹងថា បានសហការផលិតចម្រៀង «Ice Cream» ជាមួយគ្នា តែកាលណោះពួកគេមិនបានជួបគ្នាដើម្បីថតទេ ត្បិតម្ខាងថតផ្នែករបស់ខ្លួននៅក្នុងប្រទេសកូរ៉េខាងត្បូង ខណៈដែល Gomez បានថតឈុតរបស់នាងនៅសហរដ្ឋអាមេរិក ដោយសារការរឹតបន្តឹងការធ្វើដំណើរ ព្រោះជំងឺ Covid-19។ តែយ៉ាងណា នៅពេលនេះ ពួកគេបានស្កាត់ជួបគ្នាម្តង អំឡុងពេល BLACKPINK ហោះទៅអាមេរិក។
គួរជម្រាបថា Gomez មិនមែនជាអ្នកគាំទ្រដ៏ល្បីតែម្នាក់របស់ក្រុម BLACKPINK ដែលបានចូលរួមការប្រគំតន្ត្រីនៅអាមេរិករបស់ពួកគេនោះទេ។ ក្នុងចំណោមតារាល្បីៗ ដែលត្រូវបានគេប្រទះឃើញនៅក្នុងកម្មវិធីនោះ គឺឃើញមានតារាសម្ដែង Marvel Simu Liu, តារាសម្ដែង «Squid Game» Jung Ho-yeon និងតារាសម្ដែង Lily-Rose Depp ដែលសម្ដែងក្នុងរឿង «The Idol» នាពេលខាងមុខជាមួយ Jennie របស់ Blackpink។
Blackpink ចាប់ផ្តើមដំណើរទេសចរណ៍អឺរ៉ុបនៅទីក្រុងឡុងដ៍នៅចុងខែនេះ។ ពួកគេនឹងសម្តែងនៅប្រទេសសិង្ហបុរីក្នុងខែឧសភា ឆ្នាំ២០២៣ ខណៈសំបុត្រលក់អស់ក្នុងរយៈពេល៩០នាទីដំបូងប៉ុណ្ណោះ នៅពេលដែលពួកគេបានដាក់លក់នៅថ្ងៃទី២៤ ខែវិច្ឆិកាថ្មីៗនេះ៕
