(កូរ៉េ)៖ តារាជើងចាស់ Oh Young-soo ដែលទស្សនិកជនស្គាល់ថា តាណាំ ក្នុងរឿងល្បី «Squid Game» បានបាត់បង់ឱកាសសម្តែងរឿងភាគថ្មី ចំណងជើងថា «Love Letters» ដែលគ្រោងថតនៅខែមករាខាងមុខ ខណៈស្ពតពាណិជ្ជកម្មដែលលោកធ្លាប់ចូលរួមសម្តែង ក៏ត្រូវបានគេដកចោល បន្ទាប់ពីលោកត្រូវបានចាប់ខ្លួន ក្រោយការចោទប្រកាន់ពីករណីរំលោភបំពានផ្លូវភេទ។ នេះបើតាមការចេញផ្សាយ របស់សារព័ត៌មាន Straits Times នៅថ្ងៃទី២៨ ខែវិច្ឆិកា ឆ្នាំ២០២២។
តាមរបាយការណ៍បានឲ្យដឹងថា ស្ត្រីម្នាក់បានដាក់ពាក្យប្តឹងទៅប៉ូលិស ប្រឆាំងនឹងតារាសម្ដែងកូរ៉េខាងត្បូងវ័យ ៧៨ឆ្នាំកាលពីខែធ្នូ ឆ្នាំ ២០២១ ហើយសំណុំរឿងនេះត្រូវបានបញ្ជូន ទៅព្រះរាជអាជ្ញាក្នុងខែកុម្ភៈ។ តែយ៉ាងណា សំណុំរឿងនេះត្រូវបានបញ្ជូនមកប៉ូលិសវិញ ដើម្បីធ្វើការស៊ើបអង្កេតបន្ថែម ហើយប៉ូលិសបានច្រានចោលករណីនេះកាលពីខែមេសា។
ទោះបីជាយ៉ាងណាក៏ដោយ ព្រះរាជអាជ្ញាបានចាប់ផ្តើមស៊ើបអង្កេតករណីនេះឡើងវិញ បន្ទាប់ពីស្ត្រីខាងលើ បានប្តឹងទៅឧទ្ធរណ៍ចំពោះការសម្រេចចិត្តរបស់ប៉ូលីស ខណៈដែល Oh ត្រូវបានគេរាយការណ៍ថា បានបដិសេធការចោទប្រកាន់ ក្នុងអំឡុងពេលស៊ើបអង្កេតដោយព្រះរាជអាជ្ញា, ក្រសួងវប្បធម៌ កីឡា និងទេសចរណ៍ បានប្រកាសថា ខ្លួនបានលុបចោលការផ្សាយពាណិជ្ជកម្មដែលសម្តែងដោយ Oh Young-soo តែម្តង ក្រោយព័ត៌មានរបស់តារារូបនេះ ពីករណីខាងលើ ត្រូវបានផ្សព្វផ្សាយជាសាធារណៈ។
បន្ថែមពីនេះ រូបភាព និងការបង្ហោះជាមួយ Oh ក៏ត្រូវបានដកចេញពីប៉ុស្តិ៍ YouTube របស់រដ្ឋាភិបាលកូរ៉េខាងត្បូង និងគេហទំព័រផ្លូវការរបស់ការិយាល័យ សម្រាប់ការសម្របសម្រួលគោលនយោបាយរដ្ឋាភិបាលផងដែរ។
គួរជម្រាបថា សម្រាប់តារាសម្តែងប្រុសវ័យ៧៨ឆ្នាំ លោក Oh Young-soo មានភាពល្បីល្បាញយ៉ាងខ្លាំង បន្ទាប់ពីចូលរួមសម្តែងក្នុងខ្សែភាពយន្តដ៏ល្បី «Squid Game»។ តារារូបនេះ ក៏ឈ្នះបានពានរង្វាន់ ជាតួសម្តែងល្អបំផុតក្នុងប្រភេទទូរទស្សន៍ នៅឯកម្មវិធី Golden Globe Awards ឆ្នាំ២០២២ផងដែរ ដែលធ្វើឲ្យលោកក្លាយជាតារាសម្តែងកូរ៉េខាងត្បូងដំបូងគេ ដែលឈ្នះពានរង្វាន់នេះ៕
