(ភ្នំពេញ)៖ លោក Daniel Craig ដែលជាតារាសម្តែងអង់គ្លេសដ៏ល្បីល្បាញលើពិភពលោក ដែលស្គាល់លោកជាតួJames Bond ហើយលោកក៏ជាអ្នកតស៊ូមតិសកលរបស់អង្គការសហប្រជាជាតិ សម្រាប់ការលុបបំបាត់មីន និងអាវុធផ្ទុះ។
តាមរយៈវីដេអូ អបអរសាទរខួបលើកទី៣០ នៃសកម្មភាពដោះមីននៅកម្ពុជា ដែលរៀបចំឡើងដោយកម្មវិធីអភិវឌ្ឍន៍របស់អង្គការសហប្រជាជាតិ (UNDP) រួមជាមួយនឹងអាជ្ញាធរកម្ពុជាគ្រប់គ្រងសកម្មភាពកំចាត់មីន និងសង្គ្រោះជនពិការដោយសារមីន(CMAA) លោក Daniel Craig បានចាត់ទុកថា លោកពិតជាមានសំណាងដែលបានចូលរួមក្នុងសកម្មភាពកំចាត់មីន និងសង្គ្រោះជនពិការដោយសារមីននៅកម្ពុជា។
លោក Daniel Craig បានចែករំលែកក្នុងវីដេអូដ៏គួរឱ្យចាប់អារម្មណ៍ ដែលអំពាវនាវឱ្យមានការគាំទ្របន្ថែមពីសហគមន៍អន្តរជាតិថា «ចាប់តាំងពីមានសកម្មភាពបោសសម្អាតមីនមក ដែលបានផ្តួចផ្តើមឡើងនៅឆ្នាំ១៩៩២ គឺ៣០ឆ្នាំមុន មនុស្សជាង ១លាននាក់ បានទទួលផលប្រយោជន៍ក្រោមការដឹកនាំរបស់ អាជ្ញាធរកម្ពុជាគ្រប់គ្រងសកម្មភាពកំចាត់មីន និងសង្គ្រោះជនពិការដោយសារមីន។ នៅក្នុងការងាររបស់ខ្ញុំ ជាមួយអង្គការសហប្រជាជាតិ ខ្ញុំពិតជាមានសំណាងនិងសេចក្តីសោមន្សរីករាយដែលបានឃើញពីសមិទ្ធផល និងជីវិតមានភាពផ្លាស់ប្តូរ ក្រោយសកម្មភាពបោសសម្អាតមីន ដោយមានការជួយជ្រោមជ្រែងពីម្ចាស់ជំនួយជាច្រើន។ ទីបំផុតកម្ពុជាអាចគ្មានមីន។ ទីវាលដែលធ្លាប់តែជាកន្លែងឃាតករគំរាមកំហែងដល់គ្រប់អាយុជីវិតអាចក្លាយទៅជាទីវាលនៃក្តីសង្ឃឹម»។
អាជ្ញាធរកម្ពុជាគ្រប់គ្រងសកម្មភាពកំចាត់មីន និងសង្គ្រោះជនពិការដោយសារមីនថ្មីៗនេះបានបើកការតាំងពិពណ៌ដើម្បីប្រារព្ធខួប ៣០ ឆ្នាំនៃប្រតិបត្តិការដោះមីននេះ។ បច្ចុប្បន្នកម្ពុជាបានបោសសម្អាតគ្រាប់មីន និងយុទ្ធភណ្ឌមិនទាន់ផ្ទុះ (UXO) លើផ្ទៃដីចំនួន ២.៥៣១ គីឡូម៉ែត្រការ៉េ ពីភូមិចំនួន ១.៧០៣ ហើយបានប្រែក្លាយវាទៅជាដីលំនៅដ្ឋាន និងទីកសិកម្មប្រកបដោយសុវត្ថិភាពសម្រាប់ប្រជាជនប្រមាណ ៩ លាននាក់ក្នុងរយៈពេល ៣០ ឆ្នាំកន្លងមកនេះ។
សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានគូសបញ្ជាក់ពីផែនការរបស់រដ្ឋាភិបាលក្នុងការធានាថាកម្ពុជានឹងគ្មានមីននៅឆ្នាំ២០២៥។ ប្រតិបត្តិការបោសសម្អាតមីនរបស់ព្រះរាជាណាចក្រកម្ពុជាបានចាប់ផ្តើមនៅឆ្នាំ ១៩៩២ ដោយមានការគាំទ្រពីសហរដ្ឋអាមេរិក ជប៉ុន អូស្ត្រាលី ចក្រភពអង់គ្លេស សាធារណរដ្ឋប្រជាមានិតចិន អាល្លឺម៉ង់ ស្វីស សាធារណរដ្ឋកូរ៉េ នូវែលសេឡង់ កាណាដា ន័រវេស ហុងគ្រី បារាំង ឥណ្ឌា អៀរឡង់ អេស្ប៉ាញ ស៊ុយអែត បែលហ្សិក អូទ្រីស UNDP និង UNICEF ។
មូលនិធិព្រីនស៍ ដែលជាផ្នែកសប្បុរសធម៌ររបស់ ព្រីនស៍ ហូលឌីង គ្រុប មានមោទនភាពដែលបានធ្វើរួមចំណែកក្នុងការផ្តួចផ្តើមគំនិត និងការអនុវត្តគម្រោងក្នុងការគាំទ្រពី UNDP និង CMAA៕
