(ដូហា)៖ ការប្រកួតបញ្ចប់ពូល E នៃជុំទី៣ ជប៉ុន ប៉ះអេស្ប៉ាញ គ្រាដែលកូស្តារីកា ជួបអាល្លឺម៉ង់ ដើម្បីដណ្តើមយក ៣ពិន្ទុក្នុងការឡើងទៅវគ្គ ១៦ក្រុមជាបន្តសម្រាប់ព្រឹត្តិការណ៍ FIFA World Cup 2022 នៅប្រទេសកាតា ដែលការប្រកួតធ្វើឡើងដំណាលគ្នានាម៉ោង ២យប់រំលងអាធ្រាត្រ (ម៉ោងនៅកម្ពុជា) ឈានចូលថ្ងៃសុក្រ ទី០២ ខែធ្នូ ឆ្នាំ២០២២។
គួរដឹងថា ក្រុមសាម៉ូរៃជប៉ុន ប៉ះគោជល់អេស្ប៉ាញ នឹងត្រូវធ្វើឡើងនៅកីឡដ្ឋាន Khalifa International នៃទីក្រុង Al Rayyan។
រីឯជំនួបរវាងក្រុមកូស្តារីកា ប៉ះក្រុមអាល្លឺម៉ង់ ត្រូវធ្វើឡើងនាកីឡដ្ឋាន Al Bayt ស្ថិតក្នុងទីក្រុង Al Khor។
អ្វីដែលសំខាន់ផងនោះ សម្រាប់ក្រុមទាំង៤ ដែលស្ថិតក្នុងពូល E ជាបណ្តោះអាសន្នឆ្លងកាត់ ២ប្រកួតមកនេះ ក្រុមអេស្ប៉ាញ រកបាន ៤ពិន្ទុលើសគេ ខណៈជប៉ុន និងកូស្តារីកា មានតែ ៣ពិន្ទុស្មើគ្នា ពេលដែលក្រុមឥន្ទ្រីដែកអាល្លឺម៉ង់ មានតែ ១ពិន្ទុប៉ុណ្ណោះ៕