(អាមេរិក)៖ ក្រុមហ៊ុន Twitter នៅថ្ងៃសុក្រកន្លងទៅនេះ បានផ្អាកគណនីរបស់តារារ៉េប Ye ម្តងទៀត បើនិយាយទៅត្រឹមតែពីរខែប៉ុណ្ណោះ បន្ទាប់ពីគណនីរបស់ Ye បានបើកឲ្យដំណើរការឡើងវិញ។ ការផ្អាកនៅពេលនេះ ត្រូវបាន Elon Musk ដែលជាម្ចាស់ Twitter បាននិយាយថា ដោយសារតារារ៉េបរូបនេះ បានបំពានគោលការណ៍ បន្ទាប់ពីការបង្ហោះរបស់ Ye នាពេលថ្មីៗនេះ មានខ្លឹមសារញុះញង់ឲ្យមានអំពើហិង្សា។ នេះបើតាមការចេញផ្សាយរបស់សារព័ត៌មាន Reuters។
បើគេនៅចាំមិនភ្លេច ម្ចាស់ Twitter ថ្មី Elon Musk ដែលហៅខ្លួនឯងថា ជាអ្នកនិយាយដោយសេរីនោះ ទើបតែបានស្វាគមន៍ការវិលត្រឡប់មកវិញ របស់គណនីតារារ៉េបមកកាន់វេទិកា Twitter ក្នុងខែតុលាកន្លងទៅនេះ។ តែយ៉ាងណា ដោយសារតែ Ye បំពានគោលការណ៍ម្តងទៀត ទើបគណនីរបស់គេត្រូវបានបិទជាថ្មី។
ឆ្លើយតបនឹងការបិទគណនីរបស់ Ye នៅពេលនេះ, Elon Musk បានបង្ហោះសារនៅលើ Twitter យ៉ាងដូច្នេះថា «ខ្ញុំបានព្យាយាមអស់ពីសមត្ថភាព។ ទោះជាបែបនេះក្ដី គាត់បានបំពានច្បាប់របស់យើងម្ដងទៀតប្រឆាំងនឹងការញុះញង់ឲ្យមានអំពើហិង្សា ដូច្នេះគណនីត្រូវបានផ្អាក»។
គួរជម្រាបថា តារារ៉េបល្បីឈ្មោះរបស់អាមេរិក Ye ដែលត្រូវបានគេដឹងថា សម្បូររឿងរ៉ាវចម្រូងចម្រាស់ មានអ្នកតាមដានច្រើនជាង ៣០លាននាក់នៅលើ Twitter។ តែយ៉ាងណា ជុំវិញរឿងរ៉ាងខាងលើនេះ Ye មិនទាន់មានការឆ្លើយតបណាមួយនៅឡើយនោះទេ៕