(អាមេរិក)៖ បុរសម្នាក់ឈ្មោះ James Howard Jackson ដែលបានបាញ់ និងធ្វើឲ្យរបួសអ្នកបណ្តើរឆ្កែ Lady Gaga អំឡុងពេលហេតុការប្លន់សត្វឆ្កែ កាលពីឆ្នាំមុននោះ ត្រូវបានតុលាការកាត់ទោសឲ្យជាប់ពន្ធនាគារ រយៈពេល២១ឆ្នាំ។ នេះបើតាមការចេញផ្សាយ របស់សារព័ត៌មាន Reuters នៅថ្ងៃទី០៦ ខែធ្នូ ឆ្នាំ២០២២។
James Howard Jackson ត្រូវបានគេដឹងថា ស្ថិតក្នុងចំណោមជនសង្ស័យ៥នាក់ផ្សេងទៀត ដែលត្រូវបានកំណត់អត្តសញ្ញាណក្នុងហេតុការណ៍ការប្លន់សត្វឆ្កែប្រភេទ Bulldogs របស់កំពូលតារាចម្រៀង Lady Gaga កាលពីឆ្នាំមុន។ Jackson ត្រូវបានចោទប្រកាន់ពីបទ ប៉ុនប៉ងមនុស្សឃាត ការសមគំនិតក្នុងការប្រព្រឹត្តអំពើប្លន់ និងប្រើប្រាស់អាវុធពាក់កណ្តាលស្វ័យប្រវត្តិ។
បើតាមការិយាល័យមេធាវីនៅ Los Angeles បានឲ្យដឹងនៅថ្ងៃចន្ទសប្តាហ៍នេះថា Jackson បានទទួលស្គាល់ផងដែរ ចំពោះការចោទប្រកាន់ នៃការធ្វើឲ្យមានរបួសរាងកាយយ៉ាងខ្លាំងដល់បុរសឈ្មោះ Ryan Fischer ដែលជាអ្នកបណ្តើរឆ្កែ Lady Gaga ។ Fischer បានចូលរួមសវនាការនៅថ្ងៃចន្ទនេះ ហើយយោងតាម CNS លោកបានធ្វើសេចក្តីថ្លែងការណ៍មួយថា «បាញ់ប្រហារ បានផ្លាស់ប្តូរជីវិតរបស់លោកជារៀងរហូត»៕
