(បរទេស)៖ ខណៈតារាសម្តែងល្បី Daniel Craig ប្រកាសចូលនិវត្តន៍ពីតួអង្គ Jame Bond ត្រឹមរឿង «No Time to Die» នោះ បច្ចុប្បន្នផលិតករផ្តាច់មុខភាពយន្តនេះ ហាក់មិនទាន់សម្រេចចិត្តច្បាស់លាស់នៅឡើយ អំពីការជ្រើសរើសតួថ្មី មកសម្តែងជាតួអង្គ James Bond ឬ ភ្នាក់ងារ 007 ជំនួស Daniel Craig។ ទោះជាបែបនេះក្តី តារាប្រុសមួយរូប គឺ Aaron Taylor-Johnson កំពុងតែស្ថិតក្នុងត្រសែភ្នែកផលិតករ នឹងត្រូវបានគេសន្និដ្ឋានថា អាចនឹងជាជម្រើសចុងក្រោយ សម្រាប់មកបន្តតំណែង។

បើតាមការចេញផ្សាយពីគេហទំព័រព័ត៌មាន TMZ បានឲ្យដឹងនៅថ្ងៃទី០៥ ខែមករា ឆ្នាំ២០២៣ថា តារាសម្តែងជនជាតិអង់គ្លេស ដែលល្បីល្បាញតាមរយៈតួនាទីរបស់លោកនៅក្នុងរឿង «Kick-Ass» ហើយថ្មីៗនេះ តាមរយៈរឿង «Bullet Train» គឺលោក Aaron Taylor-Johnson ត្រូវបានគេរាយការណ៍ថា បានជួបជាមួយផលិតករ Barbara Broccoli កាលពីអំឡុងខែកញ្ញា។ មិនត្រឹមតែប៉ុណ្ណោះ លោកថែមទាំងបានតេស្តសម្តែង (Screen Test) ដែលដំណើរការបានយ៉ាងល្អផងដែរ។ នេះបើយោងតាមកាសែត Daily Mail និង Puck News។

ការសម្តែងតេស្តលើអេក្រង់ ត្រូវបានគេនិយាយថា ជាផ្នែកមួយនៃការពិនិត្យទេពកោសល្យឲ្យបានពេញលេញទៅលើ Aaron ហើយស្តាប់ទៅដូចជាមនុស្សគ្រប់គ្នាចាប់អារម្មណ៍ នឹងអ្វីដែលពួកគេបានឃើញ។ ប្រភពបាន​និយាយ​ថា Aaron ឥឡូវ​កំពុងតែស្ថិតក្នុងលំដាប់ជួរមុខ ក្នុងចំណោមតារាសម្តែងផ្សេងទៀត ប៉ុន្តែគេនៅមិន​ទាន់ជ្រើសរើស​ជា​ផ្លូវការ​នៅ​ឡើយ​ទេ។ ដូច្នេះតើនរណាជាតួអង្គ James Bond បន្ត?