(បរទេស)៖ ក្រុមហ៊ុន Apple បានប្រកាសបង្ហាញគម្រោង Apple Car ជាផ្លូវការ និងបានបញ្ជាក់ថា វានឹងបង្ហាញខ្លួននៅឆ្នាំ២០២៤ ប៉ុន្តែមកទល់ពេលនេះ គេមិនទាន់ដឹងច្បាស់ទេថា គម្រោង Apple Car ជាអ្វីឱ្យប្រាកដ។
ចាប់តាំងពី Apple បានប្រកាសបង្ហាញគម្រោងមួយនេះជាផ្លូវការមក ព័ត៌មានបែកធ្លាយជាច្រើនក៏បានលេចឡើង ក្នុងនោះដូចជា ក្រុមហ៊ុន Apple បានសហការជាមួយនឹងក្រុមហ៊ុនផលិតរថយន្ត Hyundai Motor Group និងបានផ្ដល់សិទ្ធិឱ្យក្រុមហ៊ុន Kia ដែលជាបុត្រសម្ព័ន្ធក្នុងការទទួលផលិតគម្រោងនេះ។ ប៉ុន្តែក្រោយមក ក៏មានព័ត៌មានថ្មីថា Apple ជាអ្នកទទួលបន្ទុកផលិត Apple Car ដោយផ្ទាល់។
កាលពីដើមឆ្នាំ២០២២ មានរបាយការណ៍ជាច្រើនបានចេញផ្សាយថា ក្រុមហ៊ុន Apple នឹងផលិតរថយន្តអគ្គិសនីបើកបរដោយស្វ័យប្រវត្តិ និងមិនមែនជារថយន្តអគ្គិសនីបើកបរដោយមនុស្សនោះទេ។ ពាក់ព័ន្ធនឹងព័ត៌មាននេះផងដែរ លោក Tim Cook បានឆ្លើយនៅក្នុងកិច្ចសម្ភាន៍មួយជាមួយនឹងសំណួរថា តើក្រុមហ៊ុន Apple ផលិតរថយន្តដោយខ្លួនឯង ឬផលិតបច្ចេកវិទ្យារថយន្ត? ចម្លើយនោះគឺថា «យើង (Apple) ចូលចិត្តធ្វើសមាហរណកម្មបច្ចេកវិទ្យា មិនថា Hardware, Software និងសេវាកម្ម។ ការធ្វើសមាហរណកម្មបច្ចេកវិទ្យា គឺជាការបង្កើតវេទមន្តមួយដ៏អស្ចារ ដូច្នេះហើយយើងចូលចិត្តធ្វើរឿងដែលអស្ចារ្យ និងវេទមន្ត»។
យោងតាមចម្លើយនេះគឺសបញ្ជាក់ឱ្យឃើញថា ក្រុមហ៊ុន Apple អាចនឹងផលិតរថយន្តមួយដែលអស្ចារ្យជាងរថយន្តដែលមាននាពេលបច្ចុប្បន្ន ប៉ុន្តែយើងមិនច្បាស់ថា វាជារថយន្តអគ្គិសនី ឬរថយន្តបើកបរដោយស្វ័យប្រវត្តិ ឬរថយន្តសម្រាប់មនុស្សប្រើប្រាស់នោះទេ។
យោងតាមព័ត៌មានដែលបានចេញផ្សាយកាលពីចុងឆ្នាំ២០២២ បានឱ្យដឹងថា ក្រុមហ៊ុន Apple ពិតជាមានគម្រោងផលិតរថយន្ត Apple Car ដោយខ្លួនឯងពិតមែន។ ប្រភពបែកធ្លាយបានបង្ហាញឱ្យដឹងថា ក្រុមហ៊ុន Apple បានសិក្សា និងស្រាវជ្រាវទៅលើគម្រោង Apple Car តាំងពីឆ្នាំ២០១៤ និងនៅឆ្នាំ២០១៦ ក្រុមហ៊ុន Apple បានស្វែងរកដៃគូរសហការទៅលើគម្រោងមួយនេះ ប៉ុន្តែ Apple បានផ្លាស់ប្ដូរចិត្តវិញ ដោយងាកមកបន្តការស្រាវជ្រាវដោយខ្លួនបន្តទៀត។
របាយការណ៍ចុងក្រោយបានបង្ហាញឱ្យដឹងថា ត្បិតតែគម្រោង Apple Car បានជួបប្រទះនឹងបញ្ហាមួយចំនួនដូចជាកូវីដ១៩, ខ្សែសង្វាក់ផលិកម្ម និងផ្គត់ផ្គង់ក្ដី ប៉ុន្តែ Apple បានព្យាយាមជំរុញគម្រោងមួយនេះឱ្យដំណើរការទៅមុនជានិច្ច និងដើម្បីដាក់បង្ហាញឱ្យទាន់ពេលវេលា៕