(បរទេស)៖ ក្រុមហ៊ុនស្រាវជ្រាវទីផ្សារ IDC បានឱ្យដឹងថា ការលក់ស្មាតហ្វូនរបស់ប្រទេសចិន បានធ្លាក់ចុះ ១៣ភាគរយក្នុងឆ្នាំ ២០២២ បើធៀបទៅនឹងឆ្នាំមុន ដែលវាការធ្លាក់ចុះដ៏ធំបំផុតសម្រាប់វិស័យនេះ ក្នុងរយៈពេលមួយទសវត្សរ៍ចុងក្រោយ ដោយសារតែអ្នកប្រើប្រាស់មិនសូវហ៊ានចំណាយប្រាក់ទៅលើការផ្លាស់ប្ដូរស្មាតហ្វូន និងដោយសារជំងឺកូវីដ១៩ផ្ទុះឡើងវិញ។
យោងតាមការចេញផ្សាយរបស់សារព័ត៌មាន Reuters នៅថ្ងៃទី៣០ ខែមករា ឆ្នាំ២០២៣ បានឱ្យដឹងថា ស្មាតហ្វូនសរុបដែលបាននាំចេញមានចំនួន ២៨៦លានគ្រឿង នៅក្នុងឆ្នាំ ២០២២ ដោយបានធ្លាក់ចុះពី ៣២៩លានគ្រឿង។
IDC បាននិយាយនៅក្នុងរបាយការណ៍មួយថា នោះមានន័យថាបរិមាណលក់សរុបក្នុងឆ្នាំ២០២២ គឺទាបបំផុតចាប់តាំងពីឆ្នាំ ២០១៣ ហើយជាលើកដំបូងចាប់តាំងពីពេលនោះមក ការលក់ប្រចាំឆ្នាំបានធ្លាក់ចុះក្រោម ៣០០លានគ្រឿង។
ក្រុមហ៊ុនផលិតទូរស័ព្ទ Vivo គឺជាម៉ាកដែលលក់ដាច់បំផុតក្នុងឆ្នាំនេះ ជាមួយនឹងចំណែកទីផ្សារ ១៨,៦ភាគរយ បើទោះបីជាការនាំចេញសរុបរបស់វាបានធ្លាក់ចុះ ប្រមាណ ២៥ភាគរយក្ដី ខណ:ដែល Honor ជាប់ចំណាត់ថ្នាក់ជាម៉ាកដែលលក់ដាច់ជាងគេទីពីរ ជាមួយនឹងការនាំចេញកើនឡើងជាង ៣៤ភាគរយ។
ការធ្លាក់ចុះនៃការលក់ទូរស័ព្ទទំនើបក្នុងប្រទេសចិន បានឆ្លុះបញ្ចាំងពីដំណើរការរបស់វិស័យនេះនៅទូទាំងពិភពលោក។ ក្នុងឆ្នាំ ២០២២ ការនាំចេញស្មាតហ្វូនទូទាំងពិភពលោកបានកើនឡើងដល់ ១,២ពាន់លានគ្រឿង ដែលជាចំនួនទាបបំផុតចាប់តាំងពីឆ្នាំ ២០១៣ និងការធ្លាក់ចុះពីមួយឆ្នាំទៅមួយឆ្នាំ ច្រើនជាង ១១ភាគរយ នេះបើយោងតាម IDC៕
