(អាមេរិក)៖ តារាចម្រៀងប៉ុប Beyonce បានបំបែកកំណត់ត្រា សម្រាប់ការឈ្នះពានរង្វាន់ដ៏ច្រើន ក្នុងអាជីពសិល្បៈនៅក្នុងកម្មវិធី «Grammy Awards» ដែលបានធ្វើឡើងកាលពីថ្ងៃអាទិត្យកន្លងទៅនេះ ប៉ុន្តែបានចាញ់ម្ដងទៀតក្នុងអាល់ប៊ុមល្បីឈ្មោះប្រចាំឆ្នាំ ព្រោះបានទៅលើតារាចម្រៀងអង់គ្លេស Harry Styles។ នេះបើតាមការចេញផ្សាយ របស់សារព័ត៌មាន Reuters នៅថ្ងៃទី០៦ ខែកុម្ភៈ ឆ្នាំ២០២៣។
Beyonce ឈ្នះបានពានរង្វាន់ Grammys ចំនួនបួនបន្ថែមទៀតក្នុងឆ្នាំនេះ រួមទាំងអាល់ប៊ុមរាំល្អបំផុត ដែលនាំឲ្យពានដែលនាងទទួលបាន ពីអាជីពសិល្បៈសរុបដល់ទៅ ៣២ពាន ដែលនេះត្រូវបានគេចាត់ទុកថា លើសពីពានរង្វាន់ចំនួន៣១ ដែលប្រមូលបានដោយអ្នកដឹកនាំបុរាណលោក Georg Solti។
ទោះបីជានាងទទួលបានជោគជ័យ ជាច្រើនឆ្នាំមកនេះក៏ដោយ ក៏ Beyonce វ័យ៤១ឆ្នាំរូបនេះ មិនដែលឈ្នះពានរង្វាន់ «អាល់ប៊ុមល្អបំផុត» នោះដែរ។ ផ្ទុយទៅវិញ តារាចម្រៀងអង់គ្លេស Harry Styles ទៅវិញទេ បានឈ្នះពានរង្វាន់កំពូលមួយនេះ។
គួរជម្រាបថា បន្ទាប់ពីការរង់ចាំជាយូរ ពិធីប្រគល់ពានរង្វាន់ផ្នែកតន្ត្រីដ៏មានកិត្យានុភាពបំផុតលើពិភពលោក គឺ Grammy Award ក៏បានប្រព្រឹត្តទៅនៅទីក្រុងឡូសអេនជេលឡេស សហរដ្ឋអាមេរិក នាព្រឹកថ្ងៃទី៦ ខែកុម្ភៈ (ម៉ោងនៅកម្ពុជា)៕