(ភ្នំពេញ)៖ សហគ្រិនខ្មែរ (Khmer Enterprise) ដែលជាស្ថាប័នក្រោមចំណុះ ក្រសួងសេដ្ឋកិច្ច និងហិរញ្ញវត្ថុ បានបើកសម្ពោធដាក់ឱ្យដំណើរការកម្មវិធី «ធ្វើឱ្យអាជីវកម្មប្រសើរឡើង» រដូវកាលទី៣ ជុំទី១ (Enterprise Solution Finders Season 3 Round 1) តាមរយៈប្រព័ន្ធZoom ក្រោមកិច្ចសហការជាមួយ អែនធើប្រាយវីហ្សិនអាខេដេមី (Enterprise Vision Academy) ដោយមានការចូលរួមជាអធិបតីភាពពីសំណាក់បណ្ឌិត ឈៀង វណ្ណមុនិណ្ឌ នាយកប្រតិបត្ដិសហគ្រិនខ្មែរ រួមជាមួយវត្តមានសហស្ថាបនិកនៃអែនធើប្រាយវីហ្សិនអាខេដេមី សហគ្រិន និងយុវជនដែលត្រូវបានជ្រើសរើស ចូលរួមកម្មវិធីរដូវកាលនេះ និង សហគ្រិនរដូវកាលមុនៗ។

កម្មវិធីនេះ ត្រូវបានបង្កើតឡើងនៅក្នុងឆ្នាំ២០២១ តាមរយៈគំនិតផ្ដួចផ្ដើមក្រោមកិច្ចសហការភាពជាដៃគូ រវាងសហគ្រិនខ្មែរ និង អែនធើប្រាយវីហ្សិនអាខេដេមី ដើម្បីផ្ដល់ការគាំទ្រក្នុងការកែប្រែផែនការធុរកិច្ចរបស់ សហគ្រិននៅក្នុងខេត្តសៀមរាប ដែលទទួលរងផលប៉ះពាល់ពីវិបត្តិកូវីដ១៩។ លក្ខណៈពិសេសរបស់កម្មវិធី គឺការបណ្តុះបណ្តាលទីប្រឹក្សាវ័យក្មេង ហៅថា Solution Finders ដែលជាការតម្រង់ទិសដើម្បី ពួកគាត់អាចសហការ ឬគាំទ្រដល់ម្ចាស់ធុរកិច្ចក្នុងការដោះស្រាយបញ្ហាប្រឈម និងបង្កើតជាផែនការ យុទ្ធសាស្រ្តថ្មី។
កម្មវិធីនេះធ្លាប់បានអនុវត្តចំនួនពីរ រដូវកាលរួចមកហើយ នៅក្នុងខេត្តសៀមរាប ដោយផ្ដោត ទៅលើសហគ្រាសស្ថិតនៅក្នុងវិស័យសេវាកម្ម ដែលក្នុងនោះមានវិស័យទេសចរណ៍ និងបដិសណ្ឋារកិច្ច។ ចំពោះរដូវកាលទី១ និងទី២ ម្ចាស់សហគ្រាសចំនួន ២១ នាក់ និងទីប្រឹក្សាវ័យក្មេងចំនួន ២២ នាក់បានចូលរួមក្នុងកម្មវិធីនេះ។

នៅក្នុងរដូវកាលទី៣ ដើម្បីពង្រីកវិសាលភាពទៅកាន់ខេត្តផ្សេងៗទៀត កម្មវិធី «ធ្វើឱ្យអាជីវកម្មប្រសើរឡើង» នឹងត្រូវអនុវត្តដោយរួមបញ្ចូលការរៀនតាមរយៈអនឡាញ ការសិក្សាថ្នាក់Masterclassជាក្រុម និង ការប្រឹក្សា យោបល់មួយទល់មួយជាមួយគ្រូជំនាញ។ កម្មវិធីនេះនឹងត្រូវធ្វើឡើងចំនួនបួនជុំ ដែលក្នុងមួយជុំមានខេត្តចំនួនពីរចូលរួម។ ក្រុមការងារកម្មវិធីនឹងធ្វើការសម្រិតសម្រាំង ជ្រើសរើសយកសហគ្រាសណា ដែលមានលក្ខណៈសម្បត្តិគ្រប់គ្រាន់ ហើយក្នុងមួយសហគ្រាសអាចមានតំណាងចំនួន ០២ រូបចូលរួម ក្នុងនោះ ម្នាក់ជាម្ចាស់សហគ្រាសផ្ទាល់ និងម្នាក់ទៀតជាបុគ្គលិកស្នូលឬដៃស្ដាំរបស់ម្ចាស់សហគ្រាស។

បណ្ឌិត ឈៀង វណ្ណមុនិណ្ឌ នាយកប្រតិបត្ដិសហគ្រិនខ្មែរ មានប្រសាសន៍ថា «នៅក្នុងឆ្នាំ២០២៣នេះ សហគ្រិនខ្មែរបានពង្រីកវិសាលភាពកម្មវិធីដែលសហគ្រិនខ្មែរបានរៀបចំដោយផ្ទាល់ និងក្រោមការសហការជាមួយដៃគូ បានស្ទើរតែគ្រប់ ២៥ ខេត្តក្រុង ដែលក្នុងនោះក៏មានកម្មវិធី “ធ្វើឱ្យអាជីវកម្មប្រសើរឡើង” រដូវកាលទី៣ ផងដែរ។ ក្រោយពីបានអនុវត្តកម្មវិធីនេះ ចំនួនពីរដូវកាលរួមមក សហគ្រិនខ្មែរ និង អែនធើប្រាយវីហ្សិនអាខេដេមី បានសង្កេតឃើញថា ម្ចាស់សហគ្រាសដែលចូលរួម បានប្រែក្លាយ អាជីវកម្មរបស់គាត់ឱ្យកាន់តែរីកចម្រើន ទៅមួយកម្រិត ខណៈទីប្រឹក្សាវ័យក្មេង (Solution Finder) ក៏បានអភិវឌ្ឍ សមត្ថភាពរបស់ខ្លួន ក្នុងការបម្រើកិច្ចការនៅតាមសហគ្រាសដទៃ ឬបង្កើតជាធុរកិច្ចថ្មី»។

ដោយមើលឃើញពីលទ្ធផលជាផ្លែផ្ការបស់កម្មវិធី បណ្ឌិតបានបន្ថែមទៀតថា សហគ្រិនខ្មែរ បានសម្រេចចិត្តពង្រីកវិសាលភាពនៃកម្មវិធី ដើម្បីផ្ដល់ការគាំទ្រទៅកាន់ម្ចាស់សហគ្រិននៅតាមបណ្ដា ខេត្តចំនួន ៨ ផ្សេងទៀតកម្មវិធី ដែលនេះបានចូលរួមចំណែកដល់ការអនុវត្តយុទ្ធសាស្ដ្ររបស់រាជរដ្ឋាភិបាល ក្នុងការស្ដារសេដ្ឋកិច្ចជាតិឱ្យមានភាពប្រសើរឡើងវិញ នៅក្នុងបរិបទការរស់នៅតាមគន្លងប្រក្រតីភាពថ្មី និងត្រឡប់ទៅរកវិថីនៃកំណើន ប្រកបដោយចីរភាព និងបរិយាប័ន្ន ដែលទាមទារឱ្យ មានការកែទម្រង់ និងការកសាងភាពធន់។

លោក សេង រតន:វិស្ស័យ នាយកប្រតិបត្ដិនៃអែនធើប្រាយវីហ្សិនអាខេដេមី បានលើកឡើងថា «យើងពិតជាមានសេចក្ដីសោមនស្សរីករាយយ៉ាងក្រៃលែង ដែលកម្មវិធី “ធ្វើឱ្យអាជីវកម្មប្រសើរឡើង” រដូវកាលទី៣ ត្រូវបានបើកដំណើរការជាផ្លូវការ ក្រោមកិច្ចសហការជាមួយសហគ្រិនខ្មែរ ដៃគូយុទ្ធសាស្រ្ដរបស់យើង ដែលផ្ដល់ការគាំទ្រទាំងបច្ចេកទេស និងហិរញ្ញប្បទាន។ រដូវកាលទី៣នេះ គឺជាវគ្គបណ្ដុះបណ្ដាលនិងប្រឹក្សាអាជីវកម្មទម្រង់ថ្មី សិក្សាតាមអនឡាញ និងពង្រីកការគាំទ្រដល់សហគ្រិនរហូតដល់ ៨ ខេត្ដ ដែលវាពិតជាមានសារៈសំខាន់ណាស់ ក្នុងការជួយកសាងប្រព័ន្ធអេកូឡូស៊ីសហគ្រិនភាពនៅកម្ពុជា ឱ្យកាន់តែប្រសើរឡើង។ ម្ចាស់សហគ្រាសនឹងអាចកសាងសមត្ថភាពសហគ្រិន ចំណេះដឹងស្ដីពីធុរកិច្ច និងជំនាញបច្ចេកទេសមួយចំនួនផ្សេងទៀត។ ចុងបញ្ចប់នៃកម្មវិធី ម្ចាស់សហគ្រាសនឹងមានផែនការយុទ្ធសាស្ដ្រថ្មីមួយដែលជួយកសាងគ្រឹះអាជីវកម្មឱ្យបានរឹងមាំ និងជំរុញឱ្យអាជីវកម្មមានភាពរីកលូតលាស់កាន់តែ ប្រសើរសមស្របតាមបរិបទថ្មី និងបម្រែបម្រួលនៃស្ថានភាពសេដ្ឋកិច្ចពិភពលោក»។