(ភ្នំពេញ)៖ និស្សិតច្បាប់នៃកម្មវិធីច្បាប់អន្តរជាតិ នៃសាកលវិទ្យាល័យជាតិគ្រប់គ្រង បានទទួលពានរង្វាន់ចំនួន ៣ ពីកម្មវិធីប្រកួតប្រជែងសវនាការ ប្រតិដ្ឋថ្នាក់អន្តរជាតិ ចំនួនពីរ គឺ 39th Comite Pour Le Concours Jean Pictet International Humanitarian Law Competition ដែលបានរៀបចំឡើងនៅទីក្រុងបាលី ប្រទេសឥណ្ឌូណេស៊ី និងកម្មវិធី 17th LAWASIA International Moot Competition នៅទីក្រុងស៊ីដនី ប្រទេសអូស្ត្រាលី នាពេលថ្មីៗនេះ។
និស្សិតច្បាប់នៃកម្មវិធីច្បាប់អន្តរជាតិ នៃសាកលវិទ្យាល័យជាតិគ្រប់គ្រង មួយរូបបានឈ្នះពានរង្វាន់ចំនួនពីរគឺ Spirit of LAWASIA Team Award និង LAWASIA Best Endeavor Prize នៅក្នុងកម្មវិធី 17th Lawasia International Moot Competition ដែលត្រូវបានប្រព្រឹត្ត ទៅនៅទីក្រុងស៊ីដនី ប្រទេសអូស្ត្រាលី។
កញ្ញា ហួត ស្រីពេជ្រ និស្សិតឆ្នាំទី៤ នៃកម្មវិធីច្បាប់អន្តរជាតិ បានឈ្នះពានរង្វាន់ Gilbert-Apollis Prize (ពានរង្វាន់អ្នកធ្វើសេចក្តីថ្លែងការណ៍ ផ្ទាល់មាត់ល្អបំផុត) នៅក្នុងកម្មវិធីសវនាការប្រតិដ្ឋ 39th Comite Pour Le Concours Jean Pictet International Humanitarian Law Competition ដែលត្រូវបានប្រព្រឹត្តទៅនៅទីក្រុងបាលី ប្រទេស ឥណ្ឌូណេស៊ី កាលដើមខែកញ្ញា ឆ្នាំ២០២២។ ពានរង្វាន់នេះត្រូវបានផ្តល់ជូនបុគ្គលម្នាក់ ក្នុងចំណោមអ្នកចូលរួមដែលមានសមត្ថភាព ៦៦នាក់ផ្សេងទៀតជុំវិញពិភពលោក។ និស្សិតស្រីរូបនេះ គឺជានិស្សិត កម្ពុជាដំបូងដែលទទួលបានពានរង្វាន់នេះ។
លោក ឌិន ស៊ីដែន នាយកនៃកម្មវិធីច្បាប់អន្តរជាតិ បានលើកឡើងថា «កម្មវិធីច្បាប់អន្តរជាតិ គឺជាសហគមន៍មួយ ដែលមានទំនាក់ទំនងល្អរវាងគ្នាទៅវិញទៅមក ដែលនិស្សិតអាចអភិវឌ្ឍខ្លួន ប្រកបដោយភាពវិជ្ជាជីវៈ និងចំណេះដឹង។ ការសិក្សាពីច្បាប់នៅក្នុងវិស័យថ្មីៗ ផ្តល់ឱ្យនិស្សិតនូវឱកាសដ៏មានតម្លៃ ដែលអាចអោយនិស្សិត សម្រេចបាននូវសមិទ្ធផល ដែលគ្មានព្រំដែន។ ក្នុងដំណើរសិក្សារៀនសូត្រ និស្សិតនឹងទទួលបាននូវបទពិសោធន៍ ដែលលើសពីការអប់រំផ្នែកច្បាប់។ ការហ្វឹកហ្វឺនជាក់ស្តែង ការបង្ហាញខ្លួនលើលើឆាកអន្តរជាតិ ការសិក្សាលើវិស័យផ្សេងៗគ្នា ការជំរុញទឹកចិត្ត និងការគាំទ្រពីខាងកម្មវិធីច្បាប់អន្តរជាតិ និស្សិត និងបុគ្គលិក នឹងអាចធ្វើឱ្យនិស្សិតស្វែងយល់ពីខ្លួនឯង កសាងខ្លួន និងអភិវឌ្ឍខ្លួនដោយខ្លួនឯង៕