(អង់ការ៉ា)៖ កីឡាករបាល់ទាត់ Christian Atsu នៅតែបន្តការបាត់ខ្លួននៅឡើយ បន្ទាប់ពីគ្រោះរញ្ជួយដី បានវាយប្រហារប្រទេសទួរគី កាលពីថ្ងៃទី៦ ខែកុម្ភៈកន្លងទៅ, នេះបើតាមការបញ្ជាក់ ពីភ្នាក់ងាររបស់លោក ហើយត្រូវបានចុះផ្សាយ ដោយសារព័ត៌មាន BBC នៅថ្ងៃទី១៦ ខែកុម្ភៈ ឆ្នាំ២០២៣។
កីឡាករអន្តរជាតិហ្គាណា Atsu មិនទាន់រកឃើញនោះទេ ចាប់តាំងពីគ្រោះរញ្ជួយដី ដែលបានបណ្តាលឲ្យបាក់រលំអគារ នៅទីក្រុង Hatay ជាកន្លែងដែលលោកស្នាក់នៅ។
ក្លិបរបស់លោក Hatayspor ដំបូងឡើយ បានរាយការណ៍ថា លោកត្រូវបានជួយសង្គ្រោះ «ជាមួយនឹងរបួស» ប៉ុន្តែមួយថ្ងៃក្រោយមក បានរាយការណ៍ថា ព័ត៌មាននោះមិនមែនជាការពិតនោះទេ។
Nana Sechere ជាភ្នាក់ងាររបស់ Atsu ដែលកំពុងស្ថិតនៅទីក្រុង Hatay បានឲ្យដឹងថា ពួកគេបានរកឃើញទីតាំងបន្ទប់ពិតប្រាកដ របស់កីឡាករ Atsu ហើយបានរកឃើញស្បែកជើងជាច្រើនគូរ របស់លោក។
ភ្នាក់ងារបានឲ្យដឹងដែរថា កាមេរ៉ារូបភាពកំដៅ បានបង្ហាញសញ្ញា «មនុស្សនៅមានជីវិតរហូតដល់៥នាក់» នៅខាងក្រោមកម្ទេចថ្មបាក់បែក, ប៉ុន្តែថាវាមិនអាចបញ្ជាក់ ពីសញ្ញាទាំងនោះបានទេ។
កីឡាករ Atsu បាននឹងកំពុងនៅក្នុងអគារ ជាមួយនឹងមិត្តរួមក្រុម Hatayspor និងមន្ត្រីមួយចំនួនទៀត ពេលគ្រោះរញ្ជួយដីកើតឡើង។ នាយកផ្នែកកីឡារបស់ក្លិប លោក Taner Savut ក៏បាននឹងកំពុងបាត់ខ្លួនផងដែរ។
សូមជម្រាបថា អ្នកនៅរស់រានមានជីវិតមួយចំនួន នៅតែបន្តទទួលបានការជួយសង្គ្រោះ បន្ទាប់ពីគ្រោះរញ្ជួយដី បានវាយប្រហារ នៅភាគខាងត្បូង ប្រទេសទួរគី និងភាគខាងជើងប្រទេសស៊ីរី ដែលត្រូវបានគេដឹងថា បានសម្លាប់មនុស្សជាង៤០,០០០នាក់៕