(បរទេស)៖ ក្រុមហ៊ុន Meta Platforms បានប្រកាសឱ្យដឹងនៅថ្ងៃអាទិត្យនេះថា ខ្លួនបាននិងកំពុងដាក់ឱ្យប្រើប្រាស់សាកល្បងនូវមុខងារបង់ប្រាក់ប្រចាំខែ (Monthly subscription) ដែលមានឈ្មោះថា Meta Verified។ មុខងារថ្មីនេះគឺអនុញ្ញាតឱ្យអ្នកប្រើប្រាស់ធ្វើការ Verify គណនីខ្លួនឯងបានដោយប្រើប្រាស់អត្តសញ្ញាប័ណ្ណ ដើម្បីផ្ដល់ភាពងាយស្រួលដល់ Content Creators ក្នុងការបញ្ជាក់ពីអត្តសញ្ញាណពិតរបស់ខ្លួន និងដើម្បីងាយស្រួលក្នុងការបង្កើតនូវមាតិកាសហគមន៍។
យោងតាមការចេញផ្សាយរបស់សារព័ត៌មាន Reuters បានឱ្យដឹងថា សេវាកម្មមួយនេះនឹងត្រូវដាក់ឱ្យប្រើប្រាស់សម្រាប់បណ្ដាញសង្គម Facebook និង Instagram នៅចុងសប្ដាហ៍នេះ ដោយរួមបញ្ចូលផងដែរនូវការការពារបន្ថែមប្រឆាំងនឹងការក្លែងបន្លំផ្សេងៗពាក់ព័ន្ធគណនី ជាមួយនឹងមានតម្លៃចាប់ពី ១១.៩៩ដុល្លារអាមេរិកក្នុងមួយខែសម្រាប់នៅលើគេហទំព័រ និង ១៤.៩៩ដុល្លារអាមេរិកក្នុងមួយខែសម្រាប់ប្រព័ន្ធ iOS និង Android។
ចំពោះប្រទេសដែលនឹងត្រូវដាក់ឱ្យប្រើប្រាស់សេវាកម្មនេះមុនគេនោះ ត្រូវបាន Meta បញ្ជាក់ថា Meta Verified នឹងត្រូវដាក់ឱ្យប្រើប្រាស់នៅក្នុងប្រទេសអូស្ត្រាលី និងនូវែលសេឡង់ក្នុងសប្តាហ៍នេះ ដោយមានការបើកដំណើរការជាបណ្តើរៗនៅក្នុងប្រទេសផ្សេងទៀត។
វាមិនមែនជារឿងថ្មីនោះទេសម្រាប់បណ្ដាញសង្គម ដែលដាក់ឱ្យប្រើប្រាស់សេវាកម្មបែបនេះជាមួយនឹងការបង់ប្រាក់នោះ ថ្មីៗនេះ Twitter ក៏ដាក់ចេញសេវាកម្មបែបនេះផងដែរ ខណ:ដែល Telegram បានដាក់ចេញវាកាលពីឆ្នាំមុន និងកំពុងទទួលបានការគាំទ្រយ៉ាងច្រើនផងដែរ៕