(ភ្នំពេញ)៖ ការប្រកួតបាល់ទាត់ពានរង្វាន់លីគអាជីពកម្ពុជា Cambodian League Cup 2023 នៅសប្តាហ៍ទី២នេះ ត្រូវបានបញ្ចប់ ដោយក្រុមវិសាខា បានយកឈ្នះ ម្ចាស់ផ្ទះ បឹងកេត នៅក្នុងលទ្ធផល ៣-០ កាលពីម្សិលមិញនេះ។
ទាក់ទងទៅនិងការប្រកួតរបស់ក្រុមទាំងពីរ ចូលដល់តង់ទី១ ក្រុមភ្ញៀវវិសាខា បាននាំមុខមុនមួយគ្រាប់និងទាត់បញ្ចូលទីដោយកីឡាករ TAKUMU ពាក់លេខ៨ នៅនាទីទី២៦។ លុះចូលដល់តង់ទី២ វិសាខា រកបន្ថែមបាន២គ្រាប់ទៀត ដោយកីឡាករ SOR ROTANA ពាក់លេខ៥ រកបាន១គ្រាប់នាទីទី៦៩ និងគ្រាប់ចុងក្រោយ របស់កីឡាករ MARCOS VINICIUS ពាក់លេខ១៧ នៅនាទីទី៩០+5។
គួររំលឹកថា ក្រុមវិសាខា កាលពីសប្តាហ៍ទី១ ធ្លាប់បានយកឈ្នះក្រុមព្រៃវែង ក្នុងលទ្ធផល ២-១ ថ្ងៃអាទិត្យ ទី១១ ខែកុម្ភះ កន្លងទៅ។ វិសាខា ឆ្លងកាត់ ២ប្រកួតមកនេះ ឈ្នះ២ និងបានឈរនៅចំណាត់ថ្នាក់លេខ២ មាន៦ពិន្ទុ ស្មេីនិងក្រុម សមាគមកីឡាបាល់ទាត់ ខ.ភ.ម និងគិរីវង់សុខសែនជ័យ ប្រចាំពូល (A)។
ខាងក្រោមនេះជាលទ្ធផលសរុបរបស់ក្រុមទាំង១២ នៃពានរង្វាន់លីគខាប់ឆ្នាំ២០២៣នេះ រួមមាន៖
ការប្រកួតនៅថ្ងៃសៅរ៍ ទី១៨ ខែកុម្ភះ ឆ្នាំ២០២៣ នៃពូល (B) រួមមាន៖
១៖ ISI ដង្កោសែនជ័យ ១-៣ណាហ្គា
២៖ សូលទីឡូអង្គរ ០-០ អង្គរថាយហ្គឺរ
៣៖ ព្រះខ័នរាជស្វាយរៀង ០-១ ភ្នំពេញក្រោន។
ចំណែកការប្រកួតនៅថ្ងៃអាទិត្យ ទី១៩ ខែកុម្ភះ ឆ្នាំ២០២៣ នៃពូល (A) រួមមាន៖
១៖ កោះកុង ១-២ សមាគមកីឡាបាល់ទាត់ ខ.ភ.ម
២៖ ព្រៃវែង ១-២ គិរីវង់សុខសែនជ័យ
៣៖ បឹងកេត ០-៣ វិសាខា។