(ភ្នំពេញ)៖ ការប្រកួតបាល់ទាត់ពានរង្វាន់ Cambodian League Cup ឆ្នាំ២០២៣ នៃសប្តាហ៍ទី៣ ត្រូវបានបញ្ចប់ដោយក្រុមម្ចាស់ផ្ទះណាហ្គា បានបំបាក់ក្រុមភ្ញៀវ សូលទីឡូអង្គរ យ៉ាងចាស់ដៃក្នុងលទ្ធផល ៦-០ ប្រចាំពូល B។
ទាក់ទងទៅនឹងការប្រកួតរបស់ក្រុមទាំងពីរនៃតង់ទី១ ណាហ្គាបាននាំមុខមុនដល់ទៅ ៥គ្រាប់ និងទាត់បញ្ចូលទីដោយកីឡាករ MARQUES MARCIO ពាក់លេខ១៤ រកបាន ២គ្រាប់នៅនាទីទី១៧ និង៤៤ ជាមួយមិត្តរួមក្រុម KIKUCHI YUTA ពាក់លេខ១៣ រកបាន ១គ្រាប់នៅនាទី២៦ នៅពេលកីឡាករ សុះ ស៊ូហាណា ពាក់លេខ១២ រកបាន ១គ្រាប់ នៅនាទី២៨ កីឡាករ DOS SANTOS CRISTIAN ពាក់លេខ២៣ រកបាន ១គ្រាប់នៅនាទីទី៣៦។
ចំណែកឯការប្រកួតតង់ទី២ វិញណាហ្គា ក៏បានបន្ថែម ១គ្រាប់ទៀតដោយកីឡាករ សេង សារ៉ាវុធី ពាក់លេខ៨៧ ទាត់បញ្ចូលនៅនាទី៧៥ និងធ្វេីឲ្យក្រុមទទួលបានជ័យជម្នះតែម្តង។
គួររំលឹកផងថា ណាហ្គាកាលពីសប្តាហ៍ទី២ ក៏បានយកឈ្នះ ក្រុម ISI ដង្កោសែនជ័យ ក្នុងលទ្ធផល ៣-១ ដោយបានឆ្លងកាត់ ៣ប្រកួតមកនេះ ឃេីញថា ឈ្នះ៣ មិនដែលស្គាល់ពាក្យថាចាញ់ម្តងឡេីយ និងបានឈរនៅកំពូលតារាងជាបណ្តោះអាសន្នដោយមាន ៩ពិន្ទុពេញប្រចាំពូល B។
ខាងក្រោមនេះជាលទ្ធផលសរុបរបស់ក្រុមទាំង១២ នៃការប្រកួតពានរង្វាន់លីគខាប់ ប្រចាំសប្តាហ៍ទី៣ រួមមាន៖
ការប្រកួតនៅថ្ងៃសៅរ៍ ទី២៥ ខែកុម្ភះនេះនៃពូល A រួមមាន៖
១៖ គិរីវង់សុខសែនជ័យ ២-0 បឹងកេត
២៖ អគ្គិសនីកម្ពុជា ៣-២ កោះកុង
៣៖ សមាគមកីឡាបាល់ទាត់ ខ.ភ.ម ២-១ ព្រៃវែង។
ការប្រកួតនៅថ្ងៃអាទិត្យ ទី២៦ ខែកុម្ភៈ នៃពូល B រួមមាន៖
១៖ អង្គរថាយហ្គឺរ ០-៥ ព្រះខ័នរាជស្វាយរៀង
២៖ នគរបាលជាតិ ១-៣ ISI ដង្កោសែនជ័យ
៣៖ ណាហ្គា ៦-០ សូលទីឡូអង្គរ៕
សូមបញ្ជាក់ថា សម្រាប់ក្រុមប្រចាំពូល A វិញ សមាគមកីឡាបាល់ទាត់ ខ.ភ.ម នៅតែឈរកំពូលតារាងលេខ១ ដដែល បន្ទាប់ពីបានយកឈ្នះព្រៃវែង ក្នងលទ្ធផល ២-១ និងមាន ៩ពិន្ទុ ស្មេីក្រុមគិរីវង់សុខសែនជ័យដែរ៕
