(កូរ៉េ)៖ Suga ដែលជាតារាចម្រៀងរ៉េប និងជាផលិតករមួយរូប ក្នុងក្រុមចម្រៀង BTS នឹងក្លាយជាសមាជិកទីបី នៃក្រុម ដែលបានចុះឈ្មោះចូលបម្រើយោធា ក្នុងប្រទេសកូរ៉េខាងត្បូង។ នេះបើតាមការចេញផ្សាយរបស់សារព័ត៌មាន Music Mundial នៅថ្ងៃទី០២ ខែមីនា ឆ្នាំ២០២៣។
បន្ទាប់ពី J-Hope ប្រកាសចូលបម្រើយោធា នៅពេលនេះ Suga នឹងក្លាយជាសមាជិកបន្ទាប់ដែលនឹងត្រូវ បំពេញភារកិច្ចយោធារបស់ខ្លួនក្នុងនាមជាពលរដ្ឋកូរ៉េខាងត្បូង។ ដំណឹងនេះ ត្រូវបានរាយការណ៍នៅដោយប្រព័ន្ធផ្សព្វផ្សាយជាច្រើននៅក្នុងប្រទេសកូរ៉េ ដែលបានបង្ហាញព័ត៌មានលម្អិតផ្សេងទៀតអំពីសកម្មភាពដែលសិល្បករនឹងធ្វើមុនពេលលោកចាប់ផ្តើមបម្រើយោធា។
យ៉ាងណាមិញ ពាក់ព័ន្ធនឹងការប្រគំតន្ត្រីទេសចរណ៍ពិភពលោកដែល Suga បានប្រកាស នឹងក្លាយជាពេលវេលាដែលតារារូបនេះ និយាយពាក្យថា លាទៅកាន់អ្នកគាំទ្រ។ លើសពីនេះ លោកក៏ត្រូវបានគេរំពឹងថានឹងចេញអាល់ប៊ុមទោល ឬចម្រៀងទោលផងដែរ។ សម្រាប់ពេលវេលាជាក់លាក់ដែលតារារូបនេះ ចូលបម្រើយោធាផ្លូវការនោះ មិនទាន់ត្រូវបានបង្ហើបឲ្យដឹងទេ៕