(ភ្នំពេញ)៖ តារាចម្រៀងសំនៀងផ្អែមលោក ខាន់ ជេមស៍ បានសម្រេចចិត្តដឹកដៃកូនស្រីច្បងរបស់ខ្លួនគឺកញ្ញា អេមមី ចូលជ្រកក្នុងផលិតកម្ម Galaxy Navatra ជាផ្លូវការហើយនៅថ្ងៃទី០៣ ខែមីនា ឆ្នាំ២០២៣នេះ ដោយបានធ្វើពិធីទទួលស្វាគមន៍យ៉ាងកក់ក្ដៅ ការចូលមកក្នុងគ្រួសារ Galaxy Navatra ដ៏ធំមួយនេះ។
ថ្លែងនៅក្នុងពិធីទទួលស្វាគមន៍ តារាចម្រៀង ខាន់ ជេមស៍ បានឲ្យដឹងថា ថ្ងៃនេះលោកមានកិត្តិយស និងរីករាយដែលបានចូលរួមជាមួយគ្រួសាររបស់ Galaxy Navatra។ លោកជឿជាក់ និងការបំផុសគំនិតដោយអ្នកឧកញ៉ា ឡេង ណាវ៉ាត្រា ដែលជាអ្នកដឹកនាំប្រកបដោយចក្ខុវិស័យ ដែលជាកម្លាំងចលករនៅពីក្រោយការផ្លាស់ប្តូរក្នុងវិស័យតន្ត្រីនេះ។ តាមរយៈការកម្សាន្តប្រកបដោយភាពច្នៃប្រឌិត និងបទពិសោធន៍ថ្មីៗ អ្នកឧកញ៉ាបាននាំមកនូវការរីកចម្រើនថ្មីមួយដល់ឧស្សាហកម្មតន្ត្រីកម្ពុជា។
ខាន់ ជេមស៍ បន្តថា លោកមានកិត្តិយសណាស់ដែលបានមកទីនេះក្នុងក្រុមហ៊ុនថ្ងៃនេះ រួមជាមួយនឹងឧកញ៉ា ព្រាប សុវត្ថិ ឧកញ៉ា សិរីមន្ត Kem, Seyma និងសិល្បករ សិល្បការិនីដ៏មានទេពកោសល្យទាំងអស់ ដែលបានខិតខំប្រឹងប្រែងធ្វើបដិវត្តន៍ឧស្សាហកម្មតន្ត្រីដោយរក្សាវប្បធម៌ខ្មែររបស់យើងឱ្យនៅគង់វង្ស ទាំងប្រពៃណី និងសហសម័យ ដើម្បីបន្តផ្តល់ការកម្សាន្តដល់ប្រជាជនកម្ពុជាយើង។
តារាចម្រៀង ខាន់ ជេមស៍ បានធ្វើការរំឭកនូវអតីតកាលរបស់ខ្លួនថា «ថ្ងៃនេះជាថ្ងៃដ៏សំខាន់មួយក្នុងអាជីពចម្រៀងរបស់ខ្ញុំ ព្រោះថាវាដូចទៅនឹងកាលពី ១០ឆ្នាំមុនដែរ ដែលភាពក្មេងខ្ចី និងស្វាហាប់របស់ខ្ញុំក្នុងការច្រៀង និងសម្តែងជាជនជាតិខ្មែរ។ ខ្ញុំពិតជាមានអំណរគុណយ៉ាងក្រៃលែងសម្រាប់ឱកាសផ្តល់ឱ្យកូនស្រីរបស់ខ្ញុំ តារាវ័យក្មេង Amie នូវឱកាសដើម្បីចាប់ផ្តើមអាជីពតន្ត្រីរបស់នាងឱ្យល្អបំផុត ដោយចូលរួមជាមួយ Galaxy Navatra»។
តារាចម្រៀង ខាន់ ជេមស៍ បន្តថា «ខ្ញុំទន្ទឹងរង់ចាំក្លាយជាផ្នែកនៃយុគសម័យថ្មីនៃតន្ត្រីនេះ និងដើម្បីរួមចំណែកដល់ឧស្សាហកម្មដ៏គួរឱ្យរំភើប និងប្រកបដោយភាពច្នៃប្រឌិតនេះ។ ខ្ញុំរំភើបចិត្តដែលបានក្លាយជាផ្នែកមួយនៃក្រុមផលិតកម្ម Galaxy Navatra និងជាផ្នែកមួយនៃការផ្លាស់ប្តូរដែលអ្នកឧកញ៉ា ឡេង ណាវ៉ាត្រា បានបំផុសគំនិត»។
ដោយឡែកលោកឧកញ៉ា ឡេង ប្រុស តំណាងឲ្យផលិតកម្ម Galaxy Navatra ដែលបានចូលរួមជាអធិបតីភាពក្នុងពិធីទទួលស្វាគមន៍នេះ បានថ្លែងថា ដោយបានការអនុញ្ញាតពីអ្នកឧកញ៉ា ឡេង ណាវ៉ាត្រា លោកតំណាងឱ្យបុគ្គលិកនៃផលិតកម្មហ្គាឡាក់ស៊ី ណាវាត្រា ទាំងអស់ ពិតជាមានកិត្តិយស និងសេចក្តីសោមនស្សរីករាយក្រៃលែង ក្នុងឱកាសនៃកម្មវិធីទទួលស្វាគមន៍តារាចម្រៀង លោក ខាត់ ជេមស៍ និងកញ្ញា អេមមី នាវេលានេះ។
កម្មវិធីទទួលស្វាគមន៍វត្តមានតារាចម្រៀងដ៏ល្បីឈ្មោះទាំងពីររូបនេះ ជាសក្ខីភាពបង្ហាញយ៉ាងច្បាស់ពីឧត្តមភាព និងការឈានឡើងកាន់តែខ្ពស់ត្រដែតរបស់ផលិតកម្មហ្គាឡាក់ស៊ី ណាវាត្រា ដែលជាផលិតកម្មចម្រៀងកំពូលនៅក្នុងព្រះរាជាណាចក្រកម្ពុជា និងដែលជានិច្ចកាលតែងទទួលបានការគាំទ្រស្រឡាញ់ពេញចិត្តពីសំណាក់មហាជនគ្រប់ស្រទាប់វណ្ណៈ។
សមិទ្ធផល និងស្នាដៃទាំងអស់នេះហើយគឺកើតចេញពីការដឹកនាំដ៏ប៉ិនប្រសព្វរបស់ អ្នកឧកញ៉ាអគ្គនាយក និងបណ្តាថ្នាក់ដឹកនាំផលិតកម្មទាំងអស់ ហើយក៏ជាលទ្ធផលដ៏ត្រចះត្រចង់កើតចេញពីភាពសកម្ម ទេពកោសល្យ ភាពច្នៃប្រឌិត និងស្មារតីទំនួលខុសត្រូវខ្ពស់របស់បងប្អូនបុគ្គលិកទាំងអស់គ្នាផងដែរ៕
