(សៀមរាប)៖ គម្រោងតុក្កតាយក្ស គឺជាគម្រោងសិល្បៈសហគមន៍កុមារដ៏ធំបំផុតមួយ ដែលត្រូវបានចាត់ទុកថាជាព្រឹត្តិការណ៍ទេសចរណ៍ ដែលមានមនុស្សចូលរួមទស្សនាកម្សាន្ដរាប់ម៉ឺននាក់ នឹងបង្ហែឆាប់ៗនេះនៅក្រុងសៀមរាប បន្ទាប់ពីខកខានធ្វើឡើងរយៈពេល៣ឆ្នាំ ដោយសារវិបត្តិនៃជំងឺកូវីដ១៩។
លោក អ៊ុន សាវ៉ាន់ អ្នកគ្រប់គ្រងគម្រោងតុក្តតាយក្ស បានឱ្យដឹងនៅថ្ងៃទី៧ ខែមីនា ឆ្នាំ ២០២៣នេះថា គម្រោងតុក្តតាយក្ស បានចាប់ផ្តើមបង្កើតឡើងនៅឆ្នាំ២០០៧ នេះជាឆ្នាំទី១២ហើយ ដែលបានរៀបចំព្រិត្តិការណ៍នេះឡើង ដោយឡែកសម្រាប់ឆ្នាំ២០២៣នេះ គម្រោងតុក្កតាយក្សក្រោមប្រធានបទ «ខ្មែរក្លាហាន» ហើយគម្រោងទទួលបានជោគជ័យ ដោយមានការគាំទ្រយ៉ាងច្រើនពីភ្ញៀវទេសចរជាតិ និងអន្តរជាតិ ជាពិសេសប្រជាពលរដ្ឋ នៅក្នុងក្រុងសៀមរាប។
លោកបន្តថា ពិធីដង្ហែក្បួនតុក្កតាយក្ស ដែលជាប្រភេទសត្វ និងរូបមនុស្ស ដែលធ្វើឡើងដោយ ឬស្សី ល្ពាក់ និងក្រដាសផ្សេងៗទៀត ដោយក្រុមកុមារមកពីតាមអង្គការ សាលា និងក្រុមសិល្បករជិត៥០០នាក់ ដែលចំណាយរយៈពេល ពីរសប្តាហ៍ ដើម្បីបង្ហាញអំពីការច្នៃប្រឌិតរបស់កុមារ និងក្រុមសិល្បករ ក្នុងការដំឡើងជាប្រភេទសត្វដែលប្រឈមផុតពូជនៅក្នុងប្រទេសកម្ពុជាផងដែរ។ ចំពោះការដំឡើងជាប្រភេទសត្វនេះ គឺដើម្បីឱ្យប្រជាពលរដ្ឋកម្ពុជាទំាងអស់ ចេះជួយថែរក្សា ការពារ និងអភិរក្សសត្វទាំងនោះ ព្រមទាំងលើកស្ទួយវិស័យសិល្បៈ វប្បធម៌ខ្មែរ និងលើកកម្ពស់ការយល់ដឹងអំពីការអភិវឌ្ឍវិស័យអប់រំផងដែរ។
លោក អ៊ុន សាវ៉ាន់ បានបន្តទៀតថា ចំពោះការដែលឱ្យកុមារមកចូលរួមធ្វើ និងដំឡើងតុក្កតាយក្សនេះ គឺចង់ឱ្យកុមារទំាងអស់ ចេះធ្វើការជាក្រុម ចេះសហការគ្នា និងចង់ឲ្យពួកគាត់ស្គាល់អំពីប្រភេទសត្វដែលប្រឈមផុតពូជ នៅក្នុងប្រទេសកម្ពុជា និងចេះច្នៃប្រឌិតរូបសត្វទាំងនោះឡើង ដើម្បីបង្ហាញឱ្យប្រជាពលរដ្ឋទូទៅបានស្គាល់ និងបានចូលរួមអភិរក្សសត្វទាំងនោះផង។
សម្រាប់គម្រោងតុក្តតាយក្សសម្រាប់ឆ្នាំ២០២៣នេះ មានចំនួន០៧ ក្នុងនោះដែរមាន រូបសត្វពពូលទឹក(ជាប្រភេទសត្វកម្រ និងជិតផុតពូជ) រូបកសិករ(គឺចង់លើកតម្លៃកសិករ ព្រោះបើអត់កសិករច្បាស់ណាស់ថា ប្រជាពលរដ្ឋ នឹងពិបាកក្នុងការរស់នៅ ព្រោះយើងត្រូវការអង្ករ បន្ថែ ត្រី សាច់ ដែលកសិករធ្វើយកមកទទួលទាន។ រូបអ្នកម្តាយ សត្វពស់ ត្រីគល់រាំង រូបព្រះវិសិន្ត និងរូបសត្វកម្រមួយទៀត។ គម្រោងនេះដែរ នាពេលកន្លងមកក៏មានការគាំទ្រយ៉ាងច្រើនពីសំណាក់ភ្ញៀវទេសចរជាតិ និងអន្តរជាតិ ព្រមទាំងប្រជាពលរដ្ឋនៅក្នុងខេត្តសៀមរាបផងដែរ។
លោក អ៊ុន សាវ៉ាន់ បានបញ្ជាក់ថា ក្បួនដង្ហែតុក្តតាយក្សនៅតាមដងផ្លូវក្នុងក្រុងសៀមរាប នឹងចាប់ផ្តើមនៅថ្ងៃសៅរ៍ទី១១ ខែមីនា ឆ្នាំ២០២៣ ដោយធ្វើនៅម៉ោង ៦ល្ងាច ចាប់ពីមុខវត្តដំណាក់អមតាមដងស្ទឹង ឆ្ពោះទៅទិសខាងជើង បត់ទៅផ្លូវលេខ២១ បត់ឡើងមកផ្លូវវត្តបូរណ៌ រួចចុះមកផ្លូវមាត់ស្ទឹងវិញ និងបន្តឡើងមកសួនច្បារព្រះរាជដំណាក់ជួបជុំគ្នានៅទីនោះ ដោយមានការសម្តែងសិល្បៈផ្សេងៗ។
លោកក៏រំពឹងថា គម្រោងដង្ហែតុក្កតាយក្សនេះ នឹងទាក់ទាញភ្ញៀវទេសចរជាតិ និងអន្តរជាតិចូលរួមទស្សនាកម្សាន្តឱ្យបានច្រើនកុះករ ព្រោះគម្រោងដង្ហែរតុក្តតាយក្សនេះ ក៏ជាព្រឹត្តិការណ៍ទេសចរណ៍មួយដែលមានការទាក់ទាញផងដែរ៕
