(កូរ៉េ)៖ សមាជិកក្រុម BTS Jimin និង J-Hope បានផ្តល់ព័ត៌មានថ្មីៗដល់អ្នកគាំទ្ររបស់ពួកគេ អំពីស្ថានភាពសុខភាពរបស់ Jin បន្ទាប់ពីប៉ុន្មានថ្ងៃមុន នៅពេលដែលពួកគេបានទៅលេង Jin ដល់បន្ទាយកងទ័ព។ នេះបើតាមការចេញផ្សាយ របស់សារព័ត៌មាន Music Mundial នៅថ្ងៃទី០៨ ខែមិនា ឆ្នាំ២០២៣។
Jin បានចូលបម្រើយោធា តាំងពីថ្ងៃទី១៣ ខែធ្នូ ជាថ្ងៃដែលលោកចាប់ផ្ដើមបំពេញកាតព្វកិច្ច ក្នុងនាមជាពលរដ្ឋកូរ៉េ។ ដោយហេតុផលនេះ មិត្តរួមក្រុមរបស់លោកបានគិតថា ដល់ពេលដែលត្រូវទៅសួរសុខទុក្ខលោក ហើយស្វែងយល់ពីរបៀបដែល Jin បានថែទាំសុខភាពរយៈពេល ៣ខែកន្លងមកនេះ។ បន្ទាប់ពីសួរសុខទុក្ខមិត្តរួមក្រុមដល់បន្ទាយ ពួកគេក៏បានថតមួយសន្លឹក ដើម្បីជាភស្តុតាងដែលបង្ហាញថា សមាជិកទាំងបីនៅជាមួយគ្នាអស់រយៈពេលពីរបីម៉ោង។ រូបថតនេះ គឺជាកាដូរពិសេសសម្រាប់អ្នកគាំទ្រ (ARMY) ត្បិតថា តាំងពីចូលជួរកងទ័ពមក មិនមានរបាយការណ៍ណាមួយពីសមាជិកវ័យ ៣០ឆ្នាំ Jin នោះឡើយ។
ទោះជាយ៉ាងណាក៏ដោយ ក៏ជាដំណឹងសម្រាប់អ្នកគាំទ្ររបស់លោក ដែលបានដឹងថា idol របស់គេធ្វើបានល្អហើយ មិនមានការលំបាកក្នុងការបំពេញកាតព្វកិច្ចរបស់ខ្លួននោះទេ។ ការជូនដំណឹងពីស្ថានភាពរបស់ Jin ក្នុងជួរកងទ័ព គឺសរុបមកមានស្ថានភាពល្អប្រសើរ ទាំងការរស់នៅ និងហូបចុក ខណៈតារារូបនេះ នឹងត្រឡប់មកវិញឆាប់ៗនេះ បន្ទាប់ពីបញ្ចប់កាតព្វកិច្ចយោធា៕