(ម៉ាឌ្រីត)៖ ក្លិបយក្សអេស្ប៉ាញ Real Madrid បានបង្ហាញ និងការគាំទ្រនៃចំណាត់ការបទចោទប្រកាន់ចំពោះ FC Barcelona នៃបញ្ហាអំពើពុករលួយ ដែលរកឃើញថា អាចប្រឈមនិងទណ្ឌកម្ម ករណីប្រើប្រាស់លុយទៅលើគណៈកម្មាធិការអាជ្ញាកណ្តាលលីគអេស្ប៉ាញ នាពេលកន្លងមក។ នេះបើតាមប្រភពពី BBC ឲ្យដឹងនាថ្ងៃទី១៣ ខែមីនា ឆ្នាំ២០២៣។

នេះក៏ជាជំហររៀបចំការពារខ្លួនរបស់ Real Madrid ដើម្បីការពារផលប្រយោជន៍ពួកគេ នៅពេលដែលដំណើរការក្តីត្រូវបានបើក, ខណៈដែលពួកគេបានបើកការប្រជុំពិភាក្សាក្រុមប្រឹក្សាភិបាលមួយ ហើយបានបង្ហាញជំហរនេះ ក្រោយពីបានត្រួពិនិត្យនៃបទចោទប្រកាន់យ៉ាងធ្ងន់ធ្ងរ។

កាលពីថ្ងៃសុក្យ របាយការណ៍បានបង្ហាញថា «ក្លិប FC Barcelona ត្រូវបានតុលាការបើកសវនាការជំនុំជម្រះ ពីបទពុករលួយ នៃការរំលោភលើទំនុកចិត្ត ក៏ដូចជាការកំណត់អាជីវកម្មមិនពិត» ខណៈដែលចៅក្រម មានការចោទប្រកាន់ថា ក្លិប Barca បានបង់ប្រាក់ប្រមាណ ៧.៤លានផោន ទៅកាន់អតីតប្រធានអាជ្ញាកណ្តាលលោក Jose Maria Enriquez ហើយនិងក្រុមហ៊ុនរបស់គាត់ ជាថ្នូរនៃការសម្រេចចិត្តរបស់អាជ្ញាកណ្តាល។

ដ្បិតលោក Joan Laporta ដែលជាប្រធានគ្រប់គ្រងក្លិប បានឆ្លើយតបថា «ក្លិប Barca ជាជនរងគ្រោះក្នុងយុទ្ធនាការនេះ ដើម្បីធ្វើឲ្យប៉ះពាល់ដល់កិត្តិយសរបស់ខ្លួន និងជម្រុញឲ្យអ្នកគាំទ្ររក្សាភាពស្ងប់ស្ងាត់» វាមិនមានរឿងអ្វីនោះទេ យើងនិងការពារ និងបង្ហាញថា ក្លិបមិនមានកំហុសនោះទេ។

រំលឹកផងថា ករណីនេះវាត្រូវបានបែកធ្លាយកាលពីខែមុន ដែល Barca បានផ្តល់លុយដែលត្រូវបានគេរាយការណ៍ថា មានចំនួន ៨.៤លានអឺរ៉ូ ស្មើនិង ៧.៤លានផោន នៅចន្លោះឆ្នាំ២០០១ និងឆ្នាំ២០១៨។

ក្នុងបណ្តឹងដែលតុលាការប្រចាំទីក្រុង Barcelona បានទទួលបានកាលពីថ្ងៃសុក្រ គឺថា Barca និងអតីតមន្រ្តីក្លិបនេះជាច្រើន រួមទាំងលោក Negreira មានការជាប់ពាក់ព័ន្ធករណីពុករលួយនេះ ដែលធ្វើឲ្យបាត់បង់ទំនុកចិត្ត តាមរយៈបំភ័ន្តឯកសារក្លែងក្លាយ។

បញ្ជាក់ផងថា ក្នុងការចោទប្រកាន់នេះមានការជាប់ពាកពាន់ជាមួយអតីតប្រធានលោក Jose Maria Enriquez និងលោក Sandro Rosell ចំពោះបញ្ហានេះ៕