(បរទេស)៖ តារាសម្តែងជប៉ុន-អង់គ្លេស កញ្ញា Rina Sawayama ដែលជាតួអង្គលេចធ្លោរមួយរូប ក្នុងរឿងភាពយន្តល្បី «John Wick» វគ្គ៤ ដើរជាតួអង្គ Akira នោះ បានបង្ហាញពីចំណុចគួរឲ្យចាប់អារម្មណ៍មួយចំនួន នៅពេលបានចូលរួមសម្តែងជាមួយតារាល្បី Reanu Reeves។ នេះបើតាមការចេញផ្សាយ របស់សារព័ត៌មាន International The News នៅថ្ងៃទី២៨ ខែមីនា ឆ្នាំ២០២៣។
Sawayama បានបង្ហាញខ្លួនជាលើកដំបូង ក្នុងខ្សែភាពយន្តជាមួយ John Wick: Chapter វគ្គ៤ ខណៈកន្លងទៅតារាសម្តែងស្រីរូបនេះ មានឈ្មោះល្បីតែក្នុងវិស័យតន្ត្រីប៉ុណ្ណោះ។ នៅក្នុងការសន្ទនាជាមួយ USA Today តារាស្រីជនជាតិជប៉ុន-អង់គ្លេស Sawayama បានប្រាប់ពីចំណុចមួយចំនួន របស់តារាល្បី Reeves ដោយបញ្ជាក់ថា តារាល្បីតួអង្គ John Wick ដឹងថា ជាភាពយន្តដំបូងរបស់នាង ហើយលោកបាន មើលការខុសត្រូវ និងណែនាំនាងច្រើនពីការសម្ដែងភាពយន្ត។ បើនិយាយទៅ នាងហាក់មិនប្រាកដខ្លួនឯងនោះទេ ប៉ុន្តែតារាប្រុស Reeves បានជំរុញទឹកចិត្តនាង ដើម្បីឲ្យប្រាកដថា គ្រប់យ៉ាងនាងអាចធ្វើបាន និងល្អប្រសើរ។
Sawayama ដើរតួជា Akira នៅក្នុង John Wick វគ្គ៤ ដែលជាអ្នកការពារក្នុងសណ្ឋានគារអូសាកា ដែលនាងដើរតួជាកូនស្រីរបស់ Shimazu សម្តែងដោយតារាសម្តែងជប៉ុនរឿងព្រេងនិទាន Hiroyuki Sanada។ ដោយសារតែ ដើម្បីជួយដល់តួអង្គ John Wick ពីក្រុមឧក្រិដ្ឋជន នាងនិងឪពុកត្រូវប្រយុទ្ធជាមួយឃាតករជាច្រើនលើក។
គួរជម្រាបថា ចាប់ផ្តើមចាក់បញ្ចាំងនៅថ្ងៃទី២៤ ខែមីនា កន្លងទៅនេះរឿង John Wick វគ្គ៤ ទទួលបានការគាំទ្រយ៉ាងច្រើន ដោយទទួលបានប្រាក់ចំណូលរហូតដល់ ១៣៧.៥លានដុល្លារ គិតត្រឹមថ្ងៃអាទិត្យចុងសប្តាហ៍កន្លងទៅនេះ ខណៈរឿងនេះចំណាយទុន ក្នុងការផលិតអស់ខ្ទង់១០០លានដុល្លារ៕