(មេនឆេស្ទឺ)៖ ខ្សែការពារ Luke Shaw បានចុះហត្ថលេខាលើកិច្ចសន្យាថ្មី ជាមួយក្លិប Manchester United ដែលនឹងរក្សារូបលោកឲ្យស្ថិតក្រោមកិច្ចសន្យា ដែលនឹងដំណើរការរហូតដល់ចប់យុទ្ធនាការ ២០២៦-២៧។ នេះបើយោងតាមសារព័ត៌មាន Live Score ចេញផ្សាយនៅថ្ងៃទី០៥ ខែមេសា ឆ្នាំ២០២៣។
កីឡាករអន្តរជាតិអង់គ្លេសរូបនេះ គ្រោងនឹងផុតកិច្ចសន្យានៅកីឡដ្ឋាន Old Trafford នៅពេលចប់រដូវកាលក្រោយ បន្ទាប់ពីក្លិបបានបន្តកិច្ចសន្យាលើកមុនរបស់គាត់កាលពីខែធ្នូឆ្នាំទៅ។
Shaw កំពុងស្ថិតនៅរដូវកាលទី៩ របស់លោកហើយជាមួយបិសាចក្រហម Man United និងបានលេងក្នុងតួនាទីសំខាន់ ស្ថិតក្រោមការដឹកនាំរបស់លោក Erik ten Hag ក្នុងយុទ្ធនាការនេះ ជាមួយនឹងការបង្ហាញខ្លួន ៣៦ប្រកួត ក្នុងចំណោម ៤៧ប្រកួតរបស់ពួកគេ។
Shaw បានឈ្នះពានរង្វាន់ Europa League និងពានរង្វាន់ EFL Cups ចំនួន២ នៅអំឡុងពេលជិត ១ទសវត្សរ៍របស់លោកជាមួយបិសាចក្រហម ដែលលោកបានចូលរួមដោយផ្ទេរមកពី Southampton កាលពីខែមិថុនា ឆ្នាំ២០១៤ ក្នុងតម្លៃខ្លួន ៣០លានផោន៕