(គែរ)៖ ប្រទេសកេនយ៉ា តង់ហ្សានី និងអ៊ូហ្គង់ដា បានដាក់ពាក្យរួមគ្នា ក្នុងការដេញថ្លៃធ្វើជាម្ចាស់ផ្ទះព្រឹត្តិការណ៍ប្រកួតបាល់ទាត់ Africa Cup of Nations ឆ្នាំ២០២៧។ នេះបើយោងតាមសារព័ត៌មាន BBC ចចេញផ្សាយនៅថ្ងៃទី៨ ខែមេសា ឆ្នាំ២០២៣។

ប្រទេសជាប់របងគ្នានៅទ្វីបអាហ្វ្រិកភាគខាងកើតទាំង ៣នេះ បានដាក់ពាក្យស្នើសុំ ទៅកាន់សហព័ន្ធបាល់ទាត់អាហ្វ្រិក (Caf)។

មានប្រទេស ៣ផ្សេងទៀត ក៏បានចុះឈ្មោះចូលរួមដេញថ្លៃរួមគ្នាផងដែរ គឺអាល់ហ្សេរី បូតស្វាណា និងអេហ្ស៊ីប។

អេហ្ស៊ីប បានធ្វើជាម្ចាស់ផ្ទះព្រឹត្តិការណ៍ Afcon នាពេលថ្មីៗនេះ ពោលគឺឆ្នាំ២០១៩ ស្របពេលដែលកាលពីដើមឆ្នាំនេះ អាល់ហ្សេរីបានធ្វើម្ចាស់ផ្ទះព្រឹត្តិការណ៍ African Nations Championship ដោយមានន័យថា ប្រទេសទាំងពីរនេះ ទំនងជាមិនមានបញ្ហានោះទេ ចំពោះតម្រូវការហេដ្ឋារចនាសម្ព័ន្ធ។

សូមជម្រាបថា ការដាក់ពាក្យស្នើសុំដេញថ្លៃ នឹងបន្តរហូតដល់ថ្ងៃទី២៣ ខែឧសភាខាងមុខ មុនពេលដំណើរទស្សនកិច្ចត្រួតពិនិត្យ នឹងធ្វើឡើងនៅខែមិថុនា និងខែកក្កដា៕