(ភ្នំពេញ)៖ លោកឧត្តមសេនីយ៍ឯក ឡោ សុឡេង អគ្គស្នងការរងនគរបាលជាតិ តំណាងនាយឧត្តមសេនីយ៍ សន្ដិបណ្ឌិត នេត សាវឿន អគ្គស្នងការនគរបាលជាតិ និងជាប្រធានសហព័ន្ធកីឡាបាល់ទះកម្ពុជា នៅរសៀលថ្ងៃទី២៥ ខែឧសភា ឆ្នាំ២០២៣នេះ បានអញ្ជើញជួបសំណេះសំណាលជាមួយគ្រូបង្វឹក កីឡាករ កីឡាការិនី បាល់ទះអង្គុយ ដែលត្រៀមចូលរួមប្រកួតកីឡាអាស៊ានប៉ារ៉ាហ្គេម លើកទី១២ ឆ្នាំ២០២៣ ដែលកម្ពុជាធ្វើជាម្ចាស់ផ្ទះ។

ជំនួបសំណេះសំណាលលើកទឹកចិត្តនេះ ត្រូវបានធ្វើឡើងនៅមជ្ឈមណ្ឌលជាតិនៃជនពិការ ដោយមានការលោក យី វាសនា អគ្គលេខាធិការគណៈកម្មាធិការជាតិប៉ារ៉ាឡាំពិកកម្ពុជា និងជាអគ្គលេខាធិការរងគណៈកម្មាធិការជាតិ រៀបចំការប្រកួតកីឡាអាស៊ានប៉ារ៉ាហ្គេមលើកទី១២ ឆ្នាំ២០២៣ ព្រមទាំងអ្នកពាក់ព័ន្ធជាច្រើនរូបទៀតផងដែរ។ ក្នុងនោះកីឡាករ កីឡាការិនីបាល់ទះអង្គុយ ដែលត្រៀមចូលរួមប្រកួតនោះ មានសរុបចំនួន២៥នាក់ កីឡាករ ចំនួន១៣នាក់ និងកីឡាការិនី ចំនួន១២នាក់។

ថ្លែងក្នុងឱកាសនោះ លោកឧត្តមសេនីយ៍ឯក ឡោ សុឡេង បាននាំយកនូវការផ្ដាំផ្ញើសាកសួរសុខទុក្ខ និងក្ដីនឹករលឹកពីសំណាក់ នាយឧត្តមសេនីយ៍ សន្ដិបណ្ឌិត នេត សាវឿន ជូនគ្រូបង្វឹក កីឡាករ កីឡាការិនី បាល់ទះអង្គុយគ្រប់ៗរូប ដែលត្រៀមចូលរួមប្រកួតកីឡាអាស៊ានប៉ារ៉ាហ្គេម លើកទី១២ ឆ្នាំ២០២៣ ដែលនឹងចាប់ផ្ដើមនៅក្នុងពេលឆាប់ៗខាងមុខនេះ។

លោកឧត្តមសេនីយ៍ឯក ឡោ សុឡេង ក៏បានលើកយកបទពិសោធន៍ និងជោគជ័យកន្លងទៅរបស់ក្រុមបាល់ទះជម្រើសជាតិកម្ពុជា ក្នុងសាលប្រភេទបុរស ដែលទទួលបានមេដាយប្រាក់ សម្រាប់ការប្រកួតកីឡាស៉ីហ្គេម លើកទី៣២ ដែលទើបបញ្ចប់នាពេលកន្លងទៅថ្មីៗនេះ សំដៅឲ្យក្រុមកីឡាករ កីឡាការិនីបាល់ទះអង្គុយ ត្រូវតែព្យាយាមខិតខំប្រឹងប្រែង ដើម្បីទទួលបានជោគជ័យ។

តំណាងនាយឧត្តមសេនីយ៍ សន្ដិបណ្ឌិត នេត សាវឿន បានគូសបញ្ជាក់ថា ដើម្បីឈានទៅដណ្ដើមជោគជ័យ ក្រុមកីឡាករ កីឡាការិនីទាំងអស់ ត្រូវពង្រឹងស្មារតីក្រុម រក្សាសាមគ្គីភាព ហើយត្រូវចង់ចាំថា ការប្រកួតតែប៉ុណ្ណោះ ប៉ុន្ដែតំណាងឲ្យប្រជាពលរដ្ឋកម្ពុជាជាង១៧លាននាក់ ដែលកំពុងទស្សនា។ លោកក៏បានកោតសរសើរផងដែរ ចំពោះការប្រកួតកន្លងទៅ ដែលក្រុមកីឡាបាល់ទះអង្គុយធ្វើបានល្អស្រាប់មកហើយ ដូច្នេះត្រូវបន្ដស្មារតីនេះ។

ដើម្បីជាការលើកទឹកចិត្ត គ្រាដែលក្រុមកីឡាករ កីឡាការិនី បាល់ទះអង្គុយ ដែលនឹងចាប់ផ្ដើមប្រកួតជាផ្លូវការនៅថ្ងៃទី០៤ ខែមិថុនា ឆ្នាំ២០២៣ខាងមុខនេះ នាយឧត្តមសេនីយ៍ សន្ដិបណ្ឌិត នេត សាវឿន ប្រធានសហព័ន្ធកីឡាបាល់ទះកម្ពុជា បានឧបត្ថម្ភថវិកាម្នាក់២០០ដុល្លារ និង៥លានរៀល ជូនមជ្ឈមណ្ឌលជាតិនៃជនពិការផងដែរ៕