(រ៉ូម)៖ គ្រូបង្វឹកក្លិប Napoli លោក Luciano Spalletti នឹងមិនទទួលបន្ទុក ដឹកនាំក្រុមម្ចាស់ពានរង្វាន់ជើងឯកអ៉ីតាលី Serie A នៅរដូវកាលក្រោយនោះទេ ដោយសារលោកបានស្នើសុំ ដើម្បីឈប់សម្រាករយៈពេល ១ឆ្នាំ។ នេះបើតាមការបញ្ជាក់ពីម្ចាស់ក្លិប ហើយត្រូវបានចុះផ្សាយដោយសារព័ត៌មាន CNA នៅថ្ងៃទី៣០ ខែឧសភា ឆ្នាំ២០២៣។
លោក Spalletti ទើបតែបានដឹកនាំក្រុម Napoli ដណ្តើមបានពានរង្វាន់ Serie A ជាលើកដំបូង គិតចាប់តាំងពីឆ្នាំ១៩៩០។
«លោក Spalletti ពិតជាគ្រូបង្វឹកដ៏អស្ចារ្យ ជាមនុស្សចិត្តទូលាយ, គាត់ផ្តល់ឲ្យគេច្រើន, ខ្ញុំអរគុណគាត់ ហើយឥឡូវវាពិតជាត្រឹមត្រូវ ដែលគាត់បានធ្វើអ្វីដែលគាត់ចង់ធ្វើ»។ នេះជាសម្តីម្ចាស់ក្លិប Napoli លោក Aurelio De Laurentiis បានលើកឡើងក្នុងកម្មវិធីមួយរបស់ទូរទស្សន៍ Rai TV នៅយប់ថ្ងៃអាទិត្យ។
លោក Spalletti វ័យ ៦៤ឆ្នាំបានប្រាប់ម្ចាស់ក្លិបថា លោកចង់ឈប់សម្រាក ដើម្បីធ្វើការស្រាវជ្រាវរយៈពេល ១ឆ្នាំ។ នេះបើតាមសម្តីលោក De Laurentiis។ លោកបន្ថែមថា លោកនឹងមិនប្រឆាំងចំពោះសំណើនោះទេ។
លោក Spalletti បានចូលដឹកនាំក្លិប Napoli ក្នុងឆ្នាំ២០២១៕