(កូរ៉េ)៖ ជាមួយនឹងបច្ចេកវិទ្យាជឿនលឿន នៅពេលនេះប្រទេសកូរ៉េខាងត្បូង គ្រោងនឹងដាក់មនុស្សយន្ត ឬហៅថា Robot ឲ្យដឹកនាំវង់តន្ត្រីជាលើកដំបូង ខណៈគម្រោងនេះ គឺនឹងត្រូវធ្វើឡើងសម្រាប់ការប្រគំតន្ត្រីមួយ នៅចុងខែនេះ។ នេះបើតាមការចេញផ្សាយ របស់សារព័ត៌មាន Korea Times។
បើតាមស្ថាប័នវង់ភ្លេងជាតិកូរ៉េខាងត្បូង (National Orchestra of Korea) បានឲ្យដឹងថា មនុស្សយន្តទាំងនោះ ត្រូវសម្តែង Show ដែលមានឈ្មោះថា «Absence» ប្រារព្ធឡើងនៅទីតាំងមហោស្រព Haeoreum Grand ក្នុងទីក្រុងសេអ៊ូល នៅថ្ងៃទី៣០ ខែមិថុនា ខាងមុខនេះ។ ជាពិសេសមនុស្សយន្តទាំងនោះ នឹងដើរតួជាអ្នកដឹកនាំវង់ភ្លេងថែមទៀត។ ត្បិតថាតួនាទីមនុស្សយន្តនេះ ធ្លាប់បានធ្វើឡើងជាច្រើនដងរួចហើយ នៅបណ្តាប្រទេសសនានាលើពិភពលោក ប៉ុន្តែនេះជាលើកទី១ហើយក្នុងប្រទេសកូរ៉េ។
គួរជម្រាបថា ក្នុងចំណោមមនុស្សយន្ត ដែលបានឡើងឆាកជាអ្នកដឹកនាំ គឺមានឈ្មោះថា Asimo ដែលបង្កើតឡើងដោយក្រុមហ៊ុន Honda នៅប្រទេសជប៉ុនក្នុងឆ្នាំ ២០០៨។ ឈ្មោះ Yumi ដែលជាមនុស្សយន្តនៅប្រទេសស្វីស ក្នុងឆ្នាំ ២០១៧; Alter 2 ដែលជាមនុស្សយន្តឆ្លាតវៃសិប្បនិម្មិតជំនាន់ទី២ ដែលត្រូវបានបង្កើតឡើងនៅក្នុងប្រទេសជប៉ុន ក្នុងឆ្នាំ២០១៨ និង Alter 3 ដែលជាជំនាន់ទី៣ នៃស៊េរីមនុស្សយន្ត Alter ដែលបានចេញផ្សាយនៅឆ្នាំ២០២០៕