(ឡុងដ៍)៖ អតីតខ្សែការពារក្លិប Manchester United លោក John O'Shea ត្រូវបានតែងតាំងជាគ្រូបង្គោលបណ្តោះអាសន្ន របស់ក្រុមបាល់ទាត់ជម្រើសជាតិអៀរឡង់ មុនពេលការប្រកួតមិត្តភាពអន្តរជាតិ ទល់នឹងក្រុមបែលហ្ស៊ិក និងស្វីសនៅខែក្រោយ។ នេះបើតាមការឱ្យដឹងពីសមាគមបាល់ទាត់អៀរឡង់ (FAI) ហើយត្រូវបានចុះផ្សាយដោយសារព័ត៌មាន CNA នៅថ្ងៃទី២៩ ខែកុម្ភៈ ឆ្នាំ២០២៤។
លោក O'Shea វ័យ ៤២ឆ្នាំ បានឈ្នះពានរង្វាន់ Premier League ចំនួន ៥លើក ជាមួយ Man United និងទទួលបានការកោះហៅលេងឱ្យក្រុមជម្រើសជាតិអៀរឡង់ចំនួន ១១៨លើកដែរ។
FAI បានឱ្យដឹងថា ពួកគេនឹងប្រកាសពីគ្រូបង្គោលអចិន្ត្រៃយ៍នៅខែមេសាខាងមុខ។
គួររំលឹកថា លោក Stephen Kenny បានលាលែងពីតួនាទីគ្រូបង្គោលក្រុមជម្រើសជាតិអៀរឡង់ កាលពីខែវិច្ឆិកា ឆ្នាំមុន បន្ទាប់ពីបរាជ័យក្នុងការប្រកួតជម្រុះ Euro ឆ្នាំ២០២៤៕