(រ៉ូម)៖ ខ្សែបម្រើស្លាបអ៉ីតាលី និងរបស់ក្លិប Sassuolo កីឡាករ Domenico Berardi នឹងទទួលការវះកាត់ បន្ទាប់ពីរហែកសរសៃពួរសាច់ដុំ នៅជើងខាងស្តាំរបស់លោក។ នេះបើតាមការបញ្ជាក់ពីក្លិបលេងនៅ Serie A ហើយត្រូវបានចុះផ្សាយដោយសារព័ត៌មាន CNA នៅថ្ងៃទី០៥ ខែមីនា ឆ្នាំ២០២៤។
លោកនឹងត្រូវខកខានការប្រកួតរហូតដល់ចប់រដូវកាលនេះ និងព្រឹត្តិការណ៍ Euro ឆ្នាំ២០២៤ ផងដែរ។
Berardi បានរងរបួស ក្នុងការប្រកួតចាញ់ ១-០ ប៉ះក្លិប Hellas Verona នៅថ្ងៃអាទិត្យ ខណៈកីឡាករវ័យ ២៩ឆ្នាំរូបនេះ ទើបតែវិលត្រឡប់មកពីការវះកាត់បន្ទះឆ្អឹងកំភួនជើង ដែលធ្វើឱ្យលោកខកខាន ៦ប្រកួតកន្លងទៅ។
Berardi រកបាន ៨គ្រាប់ ក្នុងការបង្ហាញខ្លួន ២៨លើក សម្រាប់ក្រុមជម្រើសជាតិអ៉ីតាលី។
គ្រូបង្វឹកក្រុមជម្រើសជាតិអ៉ីតាលី លោក Luciano Spalletti ឥឡូវនេះ អាចត្រូវរៀបចំផែនការ ដោយគ្មានវត្តមានខ្សែបម្រើស្លាបរូបនេះ សម្រាប់ព្រឹត្តិការណ៍ Euro នាឆ្នាំនេះ នៅប្រទេសអាល្លឺម៉ង់ ស្របពេលដែលបញ្ហារបួសនេះ ក៏ជាព័ត៌មានអាក្រក់ សម្រាប់ Sassuolo ដែលកំពុងតស៊ូជាមួយនឹងការកាត់ចេញពី Serie A ផងដែរ។
Sassuolo កំពុងឈរនៅចំណាត់ថ្នាក់ទី២ រាប់ពីបាតតារាង បន្ទាប់ពីរកបានតែ ១ពិន្ទុប៉ុណ្ណោះ ពី៨ប្រកួតចុងក្រោយរបស់ពួកគេ៕