(ប៉ារីស)៖ ខ្សែប្រយុទ្ធ Kylian Mbappe របស់ក្លិប PSG បានលើកឡើងថា លោកគ្មានបញ្ហាអ្វីនោះទេជាមួយនឹងអ្នកចាត់ការ Luis Enrique បន្ទាប់ពីការលេង៩០នាទីពេញសម្រាប់ក្រុមមួយនេះកាលពីថ្ងៃអង្គារ ជាលើកដំបូង គិតចាប់តាំងពីថ្ងៃទី១៤ ខែកុម្ភៈមក។
ខ្សែប្រយុទ្ធរូបនេះ រកបានគ្រាប់បាល់ទាំង ២គ្រាប់ ក្នុងការប្រកួតឈ្នះ ២-១ នៅ Champions League លើក្លិប Real Sociedad។ នេះបើយោងតាមសារព័ត៌មាន CNA ចេញផ្សាយនៅថ្ងៃទី០៧ ខែមីនា ឆ្នាំ២០២៤។
ប្រធានក្រុមជម្រើសជាតិបារាំង ដែលបានស៊ុតបញ្ចូលទីទាំង ២គ្រាប់ បានជួយឱ្យ PSG ឡើងដល់វគ្គ ៨ក្រុមចុងក្រោយ ជាលើកដំបូង គិតចាប់ពីឆ្នាំ២០២១ មករូបនេះ បានបញ្ជាក់ប្រាប់ក្លិបលេងនៅលីគ Ligue 1 កាលពីខែមុនថា លោកនឹងចាកចេញពីក្លិបនេះ នៅពេលចប់រដូវកាលនេះ។
Mbappe បានចាកចេញពីកៅអីអង្គុយបម្រុង ក្នុងការប្រកួតឈ្នះ ២-០ លើក្លិប Nantes កាលពីខែមុន ហើយបានស្ថិតក្នុងក្រុមបម្រុង ក្នុងការប្រកួតចំនួន ២លើកចុងក្រោយ ក្នុងលីគ Ligue 1 របស់ក្លិប PSG ដោយការប្រកួតទាំង ២នោះ បានបញ្ចប់ក្នុងលទ្ធផលស្មើ។
«ទំនាក់ទំនងរបស់ខ្ញុំ ជាមួយគ្រូបង្វឹកគឺល្អ។ មិនមានបញ្ហាអ្វីនោះទេ បើទោះបីជាមានមនុស្សមួយចំនួន គិតថាវាមាន។ ខ្ញុំមានបញ្ហាជាច្រើន ប៉ុន្តែគ្រូបង្វឹកមិនមែនជាបញ្ហាមួយ ក្នុងចំណោមបញ្ហារបស់ខ្ញុំនោះទេ»។ Mbappe បានប្រាប់សារព័ត៌មាន Canal Plus នៅថ្ងៃអង្គារ។
នៅពេលដែលសួរថាតើហេតុអ្វី Mbappe ស្ថិតក្នុងក្រុមបម្រុង ក្នុងការប្រកួតនាពេលថ្មីៗនេះ អ្នកចាត់ការ Luis Enrique បានប្រាប់ Canal Plus ថា «Kylian ដែលរកបាន ៥០គ្រាប់ និងបញ្ជូនបាល់បាន ២៥គ្រាប់ ជាមួយនឹងគ្រូបង្វឹកជាច្រើននាក់ និងក្រុមជាច្រើន។ ជាក់ស្តែង អនាគតដ៏ខ្លីខាងមុខ គាត់មិននៅទីនេះទៀតនោះទេ ដូច្នេះយើងត្រូវសាកល្បងរកដំណោះស្រាយផ្សេង»។
សូមជម្រាបថា PSG ដែលកំពុងស្ថិតនៅកំពូលតារាង Ligue 1 នោះ នឹងត្រូវធ្វើជាម្ចាស់ផ្ទះទទួលក្រុមភ្ញៀវ Reims នៅថ្ងៃអាទិត្យចុងសប្តាហ៍នេះ៕