(ឡុងដ៍)៖ ក្លិប Tottenham Hotspur នឹងមិនចំណាយលុយរហូតដល់ ១០០លានផោន (១២៨.៥៧លានដុល្លារ) លើការចុះកិច្ចសន្យានាំយកកីឡាករតែម្នាក់នោះទេ។ នេះបើយោងតាមសម្តីអ្នកចាត់ការ Ange Postecoglou បានលើកឡើង ហើយត្រូវបានចុះផ្សាយដោយសារព័ត៌មាន CNA នៅថ្ងៃទី១០ ខែមីនា ឆ្នាំ២០២៤។
Spurs បានចុះកិច្ចសន្យានាំយកខ្សែប្រយុទ្ធ Brennna Johnson ក្នុងតម្លៃ ៥០លានផោន និងខ្សែបម្រើ James Maddison ក្នុងតម្លៃ ៤០លានផោននារដូវកាលដោះដូរកីឡាករជាលើកដំបូងកាលពីឆ្នាំមុន របស់អ្នកចាត់ការសញ្ជាតិអូស្ត្រាលី។
កាលពីខែមករាកន្លងទៅនេះ Spurs បាននាំយកខ្សែប្រយុទ្ធ Timo Werner ក្នុងលក្ខខណ្ឌខ្ចីជើង និងខ្សែការពារ Radu Dragusin ផងដែរ។
Spurs បានចុះកិច្ចសន្យាជាមួយកីឡាករ ១០នាក់ ស្ថិតក្រោមការដឹកនាំរបស់លោក Postecoglou គិតមកទល់ពេលនេះ ហើយត្រូវបានគេរំពឹងថា នឹងចុះកិច្ចព្រមព្រៀងបន្ថែមទៀត ក្នុងពេលបិទរដូវកាល បន្ទាប់ពីបានចុះកិច្ចសន្យានាំយកខ្សែបម្រើវ័យ ១៨ឆ្នាំ សញ្ជាតិស៊ុយអែត Lucas Bergvall កាលពីខែមុន ដែលនឹងចូលរួមជាមួយពួកគេ ក្នុងខែកក្កដាខាងមុខ។
សូមជម្រាបថា ក្លិបដែលដឹកនាំដោយលោក Postecoglou កំពុងស្ថិតនៅចំណាត់ថ្នាក់ទី៥ នាតារាងលីគកំពូលអង់គ្លេស Premier League ហើយនឹងត្រូវជួបក្លិប Aston Villa ដែលកំពុងស្ថិតនៅចំណាត់ថ្នាក់ទី៤ នាថ្ងៃអាទិត្យស្អែកនេះ៕