(បរទេស)៖ ប្រធានាធិបតីកូរ៉េខាងត្បូងលោក Yoon Suk Yeol បាននិយាយនៅថ្ងៃអង្គារថា ប្រទេសរបស់លោកនឹងវិនិយោគប្រមាណ ៩.៤ ពាន់ពាន់លានវ៉ុន (ប្រហែល ៦.៩៤ ពាន់លានដុល្លារ) លើបច្ចេកវិទ្យាបញ្ញាសិប្បនិមិត្តនៅឆ្នាំ២០២៧ ដែលជាផ្នែកមួយនៃកិច្ចខិតខំប្រឹងប្រែងដើម្បីរក្សាតំណែងឈានមុខគេលើពិភពលោកនៅក្នុងវិស័យផលិតបន្ទះឈីបពាក់កណ្តាលសម្រេច (semiconductor) ដ៏ទំនើប។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃទី០៩ ខែមេសា ឆ្នាំ២០២៤។

តាមរយៈសេចក្តីប្រកាសខាងលើ ត្រូវបានប្រភពឱ្យដឹងថា ក៏នឹងរួមបញ្ចូលជាមួយនឹងមូលនិធិដាច់ដោយឡែកចំនួន ១.៤ពាន់ពាន់លានវ៉ុន ដើម្បីជំរុញក្រុមហ៊ុន AI semiconductor ផងដែរ។ ខណៈការផ្តល់ជូននេះ ធ្វើឡើងនៅពេលដែលកូរ៉េខាងត្បូងកំពុងព្យាយាមរក្សាឱ្យជាប់ជាមួយនឹងបណ្តាប្រទេសយក្សដូចជា សហរដ្ឋអាមេរិក ចិន និងជប៉ុនជាដើម ជាមួយនឹងការផ្តល់ការគាំទ្រគោលនយោបាយដើម្បីពង្រឹងខ្សែសង្វាក់ផ្គត់ផ្គង់ Semiconductor របស់ខ្លួន។

Semiconductors គឺជាមូលដ្ឋានគ្រឹះដ៏សំខាន់នៃសេដ្ឋកិច្ច ដែលជំរុញការនាំចេញរបស់ប្រទេសកូរ៉េខាងត្បូង។ នៅក្នុងខែមីនា ការនាំចេញបន្ទះឈីបបានឈានដល់កម្រិតខ្ពស់បំផុតរបស់ប្រទេសកូរ៉េក្នុងរយៈពេល ២១ខែ ដែលមានចំនួន ១១.៧ពាន់លានដុល្លារ ឬជិតមួយភាគប្រាំនៃការនាំចេញសរុប ដែលត្រូវបានដឹកជញ្ជូនដោយសេដ្ឋកិច្ចធំបំផុតទី៤ របស់អាស៊ី។ លោក Yoon បានថ្លែងនៅក្នុងកិច្ចប្រជុំនៅថ្ងៃអង្គារនេះថា «ការប្រកួតប្រជែងនាពេលបច្ចុប្បន្ននៅក្នុង semiconductor គឺជាសង្រ្គាមឧស្សាហកម្ម និងសង្រ្គាមទាំងស្រុងរវាងប្រទេសនានា»។

គួរជម្រាបដែរថា ប្រទេសកូរ៉េខាងត្បូងគ្រោងនឹងពង្រីកការស្រាវជ្រាវ និងការអភិវឌ្ឍន៍យ៉ាងសំខាន់នៅក្នុងបន្ទះឈីប AI ដូចជាអង្គភាពដំណើរការសរសៃប្រសាទសិប្បនិម្មិត (NPUs) និងបន្ទះឈីបអង្គចងចាំកម្រិតបញ្ជូនខ្ពស់ជំនាន់ក្រោយក្នុងពេលឆាប់ៗខាងមុខនេះ។ នេះបើយោងតាមសេចក្តីថ្លែងការណ៍របស់រដ្ឋាភិបាលកូរ៉េខាងត្បូង៕