(បាសេឡូណា)៖ អ្នកចាត់ការក្លិប FC Barcelona ដែលត្រូវបានបណ្តេញចេញពីតំណែង លោក Xavi Hernandez បានលើកឡើងថា អ្នកស្នងតំណែងពីលោក នឹងជួបការលំបាកក្នុងការកាន់តួនាទីនេះ។ នេះបើយោងតាមសារព័ត៌មាន BBC ចេញផ្សាយនៅថ្ងៃទី២៨ ខែឧសភា ឆ្នាំ២០២៤។
បុរសសញ្ជាតិអេស្ប៉ាញ វ័យ ៤៤ឆ្នាំ ត្រូវបានបណ្តេញចេញពីតំណែង មុនពេលទទួលបន្ទុកដឹកនាំការប្រកួតចុងក្រោយរបស់ពួកគេរដូវកាលនេះ ដោយបានឈ្នះ ២-១ លើគូប្រជែង Sevilla។
អតីតអ្នកចាត់ការក្រុមជម្រើសជាតិអាល្លឺម៉ង់ និងក្លិប Bayern Munich លោក Hansi Flick គ្រោងនឹងជំនួសតំណែងរបស់លោក Xavi។
លោក Xavi ថា «ផ្ញើទៅកាន់អ្នកចាត់ការថ្មី ខ្ញុំប្រាប់អ្នក។ អ្នកនឹងរងទុក្ខលំបាក។ វាគឺជាទីកន្លែងដ៏ស្មុគស្មាញ។ វាគឺជាការងារដ៏លំបាក ហើយអ្នកនឹងត្រូវអត់ធ្មត់ខ្ពស់ផងដែរ»។
អតីតខ្សែបម្រើអេស្ប៉ាញ លោក Xavi បានចូលកាន់តួនាទីជាគ្រូបង្គោល Barcelona ក្នុងខែវិច្ឆិកា ឆ្នាំ២០២១ និងបានឈ្នះពានរង្វាន់ La Liga និងពាន Spanish Super Cup ក្នុងពេញ ១រដូវកាលដំបូងនៃការដឹកនាំរបស់លោក។
ក្នុងរដូវកាលនេះ Barca បានបញ្ចប់ក្នុងចំណាត់ថ្នាក់ទី២ នៅលីគ La Liga ដាច់ចំនួន ១០ពិន្ទុតាមពីក្រោយក្លិបម្ចាស់ពានរង្វាន់ជើងឯក Real Madrid៕