(កណ្តាល)៖ នាពេលថ្មីៗកន្លងទៅនេះ ក្រុមហ៊ុន ADATA Technology Co., Ltd.បាននាំយកនូវគ្រឿងឧបភោគបរិភោគ ដែលមាន អង្ករ ម្សៅអង្ករ មីកញ្ចប់ អំបិល ទឹកស៊ីអ៊ីវ ប្រេងឆា និងទឹករ៉ែធម្មជាតិ ចែកជូនដល់ប្រជាពលរដ្ឋក្រីក្រចំនួន៥០០គ្រួសារ ដែលរស់នៅភូមិបាសិទ្ធ ឃុំម្កាក់ ស្រុកអង្គស្នួល ខេត្តកណ្តាល។

នៅក្នុងកម្មវិធីនេះដែរ ដោយមានការអញ្ជើញចូលរួមពីលោក Chen Libai ប្រធានក្រុមហ៊ុន ADATA Technology Co., Ltd. លោកគ្រូ Lianze, លោក សេង ហូត ប្រធានសម្ព័ន្ធយុវជនអាហារូបករណ៌ (ស២) ប្រចាំប្រទេសចិន និងអភិបាលរងស្រុកអង្គស្នួល និងលោក ណែម ចន្នី ជំទប់ទី១នៃឃុំម្កាក់ ព្រមទាំង លោក Chen Jianwen តំណាងស្ថាប័នរបស់ ក្រុមហ៊ុន ADATA Technology Co., Ltd នៅក្នុងប្រទេសកម្ពុជាផងដែរ។

ក្រុមហ៊ុន ADATA បានផ្តល់ជំនួយដល់ប្រជាពលរដ្ឋ ក្នុងតំបន់តាមស្ថានភាពជាក់ស្តែង និងបំពេញទំនួលខុសត្រូវផ្នែកសង្គម ផ្នែកសាជីវកម្ម តាមលទ្ធភាពរបស់ពួកគេផងដែរ។

នាឱកាសនោះដែរ លោក Chen Libai ប្រធានក្រុមហ៊ុន ADATA Technology Co., Ltd. បានថ្លែងថា ជាដំបូងលោកសូមថ្លែងអំណរគុណ ចំពោះមន្ត្រីរដ្ឋាភិបាល និងថ្នាក់ដឹកនាំពីស្ថាប័នពាក់ព័ន្ធនានា ដែលបានមកចូលរួមក្នុងកម្មវិធីសម្បុរសធម៌នាពេលនេះ ហើយលោកក៏បានថ្លែងអំណរគុណ ចំពោះលោក Chen Jianwen ដែលបានរៀបចំ កម្មវិធីបរិច្ចាគរបស់របរប្រើប្រាស់នានាដ៏មានអត្ថន័យនាពេលដែរ។

លោក Chen Libai បានបន្ដថា ការរួមចំណែកដល់សង្គម និងការប្តេជ្ញាចិត្តទៅកាន់អនាគត គឺជាការប្តេជ្ញាចិត្តរបស់ក្រុមហ៊ុន ADATA Technology Co., Ltd. ដូចគ្នាចាប់តាំងពីបានបង្កើតវាឡើងក្នុងឆ្នាំ២០០១ មក គឺក្រុមហ៊ុន ADATA Technology Co., Ltd. បានចូលរួមយ៉ាងសកម្មក្នុងសកម្មភាពលើកស្ទួយសុខុមាលភាព សាធារណៈផ្សេងៗ ហើយខិតខំប្រឹងប្រែងជួយ ដល់មនុស្សដែលត្រូវការជំនួយបំផុត។ ក្នុងរយៈពេល ២៣ឆ្នាំកន្លងមកនេះ ពួកគេបានធ្វើសកម្មភាពបរិច្ចាគ នៅក្នុងប្រទេសចំនួន៨ ឬ ៩ផ្សេងៗគ្នា ដើម្បីផ្តល់អំណោយដល់សង្គមជាក់ស្តែង និងអនុវត្តទំនួលខុសត្រូវសង្គមរបស់ក្រុមហ៊ុនជាមួយនឹងសកម្មភាពជាក់ស្តែងដែរ។

លើកនេះក្រុមហ៊ុនមិនត្រឹមតែ ជួយសាងសង់ផ្លូវបេតុង ក្រៅភូមិប៉ុណ្ណោះទេ ថែមទាំងបាននាំមកនូវផ្តល់ជូនប្រព័ន្ទទឹកប្រើប្រាស់ ជាពិសេសបាននាំយកអង្ករ១០០០បាវ ម្សៅអង្ករ១០០០បាវ មីកញ្ចប់៥០០កេស អំបិល៥០០បាវ ទឹកស៊ីអ៊ីវ ៥០០ដប ប្រេងឆា៥០០ដប និងទឹករ៉ែធម្មជាតិ១០០កេស។ មិនតែប៉ុណ្ណោះលោក៏សង្ឃឹមដែរថា ទៅថ្ងៃអនាគតក្រុមហ៊ុនអាចផ្តល់ជំនួយបានច្រើន តាមជាក់ស្តែងដល់ប្រជាជននៅបរិវេណភ្នំបាសិទ្ធនេះ និងចូលរួមលើកកម្ពស់ជីវភាពរស់នៅរបស់ពួកគេផងដែរ។ ពួកគេសង្ឃឹមដោយជឿជាក់ថាក្រុមហ៊ុនផ្សេងទៀត ក៏អាចជូជួយផ្សព្វផ្សាយសេចក្ដីស្រឡាញ់របស់ពួកគេបានដែរ ហើយលោកសង្ឃឹមថាកម្មវិធីនេះ នឹងជំរុញឲ្យមនុស្សកាន់តែច្រើនឱ្យយកចិត្តទុកដាក់ និងគាំទ្រក្រុមប្រជាពលរដ្ឋដែលត្រូវការជំនួយជាក់ស្តែង។

ជាមួយគ្នានេះ លោកគ្រូ Lianze បានមានសង្ឃដិកាថា ការកសាងផ្លូវ នាំយកទឹកស្អាតជូនអ្នកភូមិ និងការចែកចាយរបស់របរប្រើប្រាស់ប្រចាំថ្ងៃ គឺជាសកម្មភាពសុខុមាលភាពសាធារណៈ ដែលមានសារៈសំខាន់ជាវិជ្ជមានសម្រាប់ជីវិតមនុស្ស និងជាសកម្មភាពដែលសក្តិសមគួរឲ្យដឹងគុណពីយើងទាំងអស់គ្នា។

បន្ថែមពីនេះ លោកអភិបាលរងស្រុកបានបន្ដថា ថ្លែងអំណរគុណដល់ក្រុមហ៊ុន ADATA Technology Co., Ltd ដែលបានជួយដល់ប្រជាពលរដ្ឋក្នុងឃុំម្កាក់ អស់រយៈពេលជាច្រើនឆ្នាំមកនេះ និងបាននាំមកនូវផ្លូវថ្នល់ធ្វើដំណើរធំទូលាយ និងផ្គត់ផ្គង់ទឹកស្អាតជូនប្រជាពលរដ្ឋ ដែលនេះបង្ហាញឲ្យឃើញថាក្រុមហ៊ុន ADATA គឺជាក្រុមហ៊ុនដែលមានចិត្តសម្បុរស ហើយជាក្រុមហ៊ុនដែលទទួលបានការគាំទ្រខ្លាំង។

បន្ទាប់ពីបានសំណេះសំណាលរួចរាល់ ក្រុមហ៊ុន ADATA Technology Co., Ltd. បានចាប់ផ្តើមចែកសម្ភារៈប្រើប្រាស់ប្រចាំថ្ងៃ ជូនចំពោះប្រជាពលរដ្ឋ ដោយកម្មវិធីទាំងមូលគឺផ្តល់នូវស្នាមស្នាមញញឹមដ៏កក់ក្តៅ និងសុភមង្គល ហើយស្នាមញញឹមទាំងអស់នេះក៏ហាក់ដូចជាបង្ហាញដល់មនុស្សគ្រប់គ្នាអំពីសេចក្តីស្រឡាញ់ពិត ទំនួលខុសត្រូវសង្គម និងការរួមចំណែកដល់សង្គម និងសន្យាបន្តធ្វើសកម្មភាពទៅថ្ងៃអនាគត ដែលជាគោលបំណងសាជីវកម្មរបស់ក្រុមហ៊ុន ADATA Technology Co., Ltd ដូច្នោះដែរ។

គួរបញ្ជាក់ផងដែរថា ADATA Technology Co., Ltd. ត្រូវបានបង្កើតឡើងនៅតៃវ៉ាន់ក្នុងឆ្នាំ២០០១ ដោយមានដើមទុនចុះបញ្ជីចំនួន ៩៤.៥ លានដុល្លារអាម៉េរិក ដោយមានរោងចក្រធំៗនៅក្នុងទីក្រុង Suzhou ប្រទេសចិន នៅប្រទេសប្រេស៊ីល និងកន្លែងផ្សេងទៀតដែលមានតម្លៃទីផ្សារបច្ចុប្បន្នរហូតដល់ ៩៦៧ លានដុល្លារអាម៉េរិក ដែលនេះគឺជាចំនួនធំជាងគេ ទីពីរនៅក្នុងពិភពលោក និងជាចំនួនលំដាប់ទីមួយនៅតំបន់អាស៊ី ដោយផ្គត់ផ្គង់ប្រភេទ មេម៉ូរី (DRAM) និងជាក្រុមហ៊ុនផលិត SSD ផងដែរ៕