(ភ្នំពេញ)៖ ធនាគារ ABA បានទទួលពានរង្វាន់ «ធនាគារបម្រើសេវារូបវន្តបុគ្គលដ៏ឆ្នើមនៅកម្ពុជា» ជាថ្មីម្ដងទៀត ពីទស្សនាវដ្ដីធនាគារនិងហិរញ្ញវត្ថុអាស៊ី (Asian Banking and Finance)។
ការទទួលស្គាល់នេះបង្ហាញពីការប្ដេជ្ញាចិត្តរបស់ធនាគារចំពោះឧត្តមភាព និងសមិទ្ធផលល្អប្រសើរគួរឲ្យកត់សម្គាល់ក្នុងរយៈពេលមួយឆ្នាំនេះ ដែលកំណត់ដោយកំណើនឥតឈប់ឈរ និងវឌ្ឍនភាពឌីជីថលប្រកបដោយភាពច្នៃប្រឌិត។ ការយកចិត្តទុកដាក់របស់ធនាគារក្នុងការណែនាំនូវផលិតផល និងសេវាហិរញ្ញវត្ថុទំនើបជូនអតិថិជន ទទួលបានការកោតសរសើរពីសំណាក់គណៈវិនិច្ឆ័យរបស់ Asian Banking and Finance។
អំឡុងពេលពេញមួយឆ្នាំនេះ ABA Mobile ទទួលបានការពង្រឹងសមត្ថភាពសំខាន់ៗ និងនវានុវត្តន៍ដែលផ្ដោតលើអ្នកប្រើប្រាស់។ មុខងារសំខាន់ៗដែលបានដាក់ដំណើរការ រួមមាន ការកែប្រែផ្ទៃអន្ដរកម្មក្នុងកំណែ 5.0 ដោយបន្ថែមបទពិសោធថ្មីដល់អ្នកប្រើប្រាស់ក្នុងការផ្លាស់ប្ដូរផ្ទៃអេក្រង់តាមចំណូលចិត្ត និងមានភាពរស់រវើក, ពង្រឹងមុខងារសុវត្ថិភាព, និងអាចដូរ និងពង្រីកផ្ទៃអេក្រង់ឲ្យស្រួលប្រើប្រាស់ ដូចជាទំហំអក្សរ និងម៉ូដរចនាជាដើម។ ចំណុចដែលគួរឲ្យកត់សម្គាល់នោះគឺ គំនិតផ្តួចផ្តើមក្នុងការចូលប្រើសេវាធនាគារតាម ABA Mobile ដោយមិនចាំបាច់មានទិន្នន័យអ៊ីនធឺណិត ដែលអនុញ្ញាតឲ្យអ្នកប្រើប្រាស់ប្រព័ន្ធទូរស័ព្ទមួយចំនួន អាចប្រើប្រាស់សេវាធនាគារតាមតម្រូវការ ដោយមិនអស់ទិន្នន័យអ៊ីនធឺណិត ដែលជួយជំរុញដល់បរិយាបន្នហិរញ្ញវត្ថុ។
នៅឆ្នាំ២០២៣ ធនាគារបានដាក់ដំណើរការសេវាទូទាត់ឆ្លងប្រទេសតាមរយៈ QR ទៅក្នុងអេកូស៊ីស្ទែមរបស់ខ្លួន ដោយអនុញ្ញាតឲ្យអតិថិជន ABA ធ្វើប្រតិបត្តិការដោយរលូននៅប្រទេសថៃ ដោយស្គែនកូដ ThaiQR ។ ABA ក៏បានពង្រីកបណ្តាញទូទាត់ QR សម្រាប់អាជីវកររបស់ខ្លួនគួរឲ្យកត់សម្គាល់ផងដែរ ដែលកើនដល់ 43%។ ការពង្រីកនេះ ពង្រឹងជំហររបស់ ABA ក្នុងនាមជាធនាគារនាំមុខលើផ្នែកទូទាត់ឌីជីថល និងបង្កើនភាពងាយស្រួលសម្រាប់អតិថិជនរបស់ខ្លួន។
លើសពីនេះ កម្មវិធី ABA Merchant ទទួលបានកំណើនអ្នកប្រើប្រាស់សកម្មកើនដល់ 136%។ មុខងារ វិភាគទិន្នន័យលក់ដូរ ថ្មីនៅក្នុងកម្មវិធី អនុញ្ញាតឲ្យអាជីវករ/អ្នកលក់ដូរងាយស្រួលចូលប្រើប្រាស់ និងវិភាគទិន្នន័យប្រតិបត្តិការ បង្កើនប្រសិទ្ធភាពប្រតិបត្តិការ និងការចូលរួមរបស់អតិថិជន។
បន្ថែមពីនេះ ការទទួលប្រាក់ធីប តាមរយៈការទូទាត់ឌីជីថល និងការដាក់ចេញនូវកម្មវិធី ចាយបានលុយភ្លាមៗ ក៏បានធ្វើឲ្យអតិថិជន និងពាណិជ្ជករទទួលបានបទពិសោធកាន់តែប្រសើរផងដែរ។
លោក Askhat Azhikhanov នាយកប្រតិបត្តិធនាគារ ABA មានប្រសាសន៍ថា «យើងខ្ញុំមានមោទនភាពក្រៃលែង ដែលបាន ទទួលពាន ធនាគារបម្រើសេវារូបវន្តបុគ្គលដ៏ឆ្នើមនៅកម្ពុជា សម្រាប់ឆ្នាំទីបួននេះជាថ្មីម្ដងទៀត។ នៅ ABA យើងខ្ញុំនៅតែផ្តោតលើការប្រើប្រាស់បច្ចេកវិទ្យា ដើម្បីផ្តល់នូវដំណោះស្រាយហិរញ្ញវត្ថុដែលអាចចូលប្រើបាន និងងាយស្រួលប្រើប្រាស់ ដូចដែលបានបង្ហាញ តាមរយៈភាពជោគជ័យនៃកម្មវិធី ABA Mobile របស់យើងខ្ញុំ និងការពង្រីកជម្រើសទូទាត់តាមបែបឌីជីថល»។
លោកបានបន្ថែមថា «ការទទួលស្គាល់នេះ គឺជាសក្ខីភាពបញ្ជាក់ពីការយកចិត្តទុកដាក់របស់ក្រុមការងារយើងខ្ញុំ ចំពោះនវានុវត្តន៍ និងការផ្តល់នូវបទពិសោធដ៏ល្អឯកជូនដល់អតិថិជន»។
ABA សម្រេចបាននូលទ្ធផលហិរញ្ញវត្ថុដ៏លេចធ្លោ នៅគ្រប់ផ្នែកនិងកម្រិត (ម៉ែតទ្រីក) ទាំងអស់ ដែលគូសបញ្ជាក់ពីជំហររឹងមាំ របស់ខ្លួននៅក្នុងវិស័យធនាគាររបស់កម្ពុជា។ ទ្រព្យសកម្មសរុបរបស់ធនាគារកើនដល់ 27% ដែលសម្រេចឈានដល់ 11.5 ប៊ីលានដុល្លារ គិតត្រឹមដំណាច់ឆ្នាំ២០២៣។ ប្រាក់បញ្ញើរបស់អតិថិជនកើនដល់ 26% ដែលសម្រេចឈានដល់ 9.2 ប៊ីលានដុល្លារ ខណៈកម្ចីដុលមានចំនួនសរុប 7.9 ប៊ីលានដុល្លារ ដែលតួលេខនោះកើនបាន 21% គិតចាប់តាំងពីចុងឆ្នាំមុន។
នៅក្នុងសំណេរពាក់ព័ន្ធនឹងពានរង្វាន់របស់ធនាគារ ABA នាឆ្នាំនេះ ទស្សនាវដ្តី បានអធិប្បាយថា «ពានរង្វាន់នេះ គឺជាសក្ខីភាពបញ្ជាក់ពីការប្តេជ្ញាចិត្តឥតងាករេរបស់ ABA ចំពោះឧត្តមភាព និងនវានុវត្តន៍ដើម្បីបម្រើអតិថិជនរបស់ខ្លួន និងការពង្រឹងជំហររបស់ខ្លួន ក្នុងនាមជាធនាគារនាំមុខគេនៅក្នុងសហគមន៍ធនាគារកម្ពុជា។ លទ្ធផលសម្រេចបានដ៏ទូលំទូលាយនេះ ព្រមទាំងការផ្តោតជាយុទ្ធសាស្ត្រលើនវានុវត្តន៍ យកអតិថិជនជាគោល និងកំណើនប្រកបដោយស្ថិរភាព បានធ្វើឲ្យ ABA ទទួលបានពានដ៏មានកិត្យានុភាព ធនាគារបម្រើសេវារូបវន្តបុគ្គលដ៏ឆ្នើមនៅកម្ពុជា នៅក្នុងពិធីប្រគល់ពានរង្វាន់ប្រចាំឆ្នាំ 2024 របស់ទស្សនាវដ្ដី Asian Banking and Finance»។
ជាមួយនឹងសមិទ្ធផលដ៏លេចធ្លោ និងនវានុវត្តន៍ល្អឯក ABA នៅតែបន្ដប្ដេជ្ញា និងផ្ដោតលើដំណោះស្រាយឌីជីថលដែលយកអតិថិជនជាគោលចម្បង ដើម្បីធ្វើយ៉ាងណារក្សា ដំណែងឈានមុខគេ ក្នុងវិស័យធនាគារនៅកម្ពុជា៕
