(ប៉ារីស)៖ គ្រូបង្វឹក Thierry Henry បានកោះហៅកីឡាករជម្រើសជាតិបារាំង ១៨រូប ដើម្បីត្រៀមប្រកួតក្នុងព្រឹត្តិការណ៍ Olympic Games ដែលខ្លួនធ្វើម្ចាស់ផ្ទះ ដោយខ្សែប្រយុទ្ធក្លិប Crystal Palace កីឡាករ Jean-Philippe Mateta ជាកីឡាករតែ ១គត់ក្នុងលីគ Premier League ដែលត្រូវបានដាក់បញ្ចូល។ នេះបើយោងតាមសារព័ត៌មាន BBC ចេញផ្សាយនៅថ្ងៃទី០៩ ខែកក្កដា ឆ្នាំ២០២៤។
ក្រុមកីឡាករសម្រាប់ប្រកួតក្នុងព្រឹត្តិការណ៍ Olympic ត្រូវរៀបចំឡើង ដោយត្រូវជ្រើសរើសកីឡាករអាយុក្រោម ២៣ឆ្នាំ (U-23) ខណៈមានកីឡាករត្រឹមតែ ៣នាក់ប៉ុណ្ណោះ មានអាយុលើស ដែលត្រូវបានអនុញ្ញាត។
Mateta វ័យ ២៧ឆ្នាំ រកបាន ១៦គ្រាប់នៅ Premier League កាលពីរដូវកាលមុន ប៉ុន្តែមិនធ្លាប់ទទួលបានការកោះហៅ លេងឱ្យក្រុមជម្រើសជាតិបារាំងឈុតធំនោះទេ។
មានក្លិបមួយចំនួនមិនបានអនុញ្ញាតឱ្យកីឡាកររបស់ខ្លួន មកលេងក្នុងព្រឹត្តិការណ៍ Olympic នោះទេ ជាក់ស្តែងក្លិប Real Madrid មិនអនុញ្ញាតឱ្យប្រធានក្រុមឈុតធំបារាំង Kylian Mbappe ដើម្បីចូលរួមក្នុងក្រុមរបស់អ្នកចាត់ការ Henry សម្រាប់ព្រឹត្តិការណ៍ Paris 2024 នោះទេ។
អតីតកីឡាករឆ្នើមក្លិប Arsenal លោក Henry គឺជាអ្នកចាត់ការក្រុម U-21 បារាំង ហើយក៏ជាអ្នកទទួលបន្ទុកដឹកនាំក្រុមបាល់ទាត់បារាំង សម្រាប់ព្រឹត្តិការណ៍ Olympics ផងដែរ។
គាត់បានរៀបចំក្រុមបណ្តោះអាសន្នកាលពីដើមខែមិថុនា ហើយកីឡាករ Mateta រកបាន ២គ្រាប់ ក្នុងការប្រកួតកម្តៅសាច់ដុំ ដោយលទ្ធផលឈ្នះ ៤-១ លើក្រុមប៉ារ៉ាហ្គាយ៕