(ឡុងដ៏)៖ ក្លិប Brighton & Hove Albion បានសម្រេចក្នុងការទិញយកកីឡាករសញ្ជាតិបារាំង Georginio Rutter ស្ថិតក្នុងការចំណាយតម្លៃផ្ទេរកំណត់ត្រាក្លិប ៤០លានផោន ដែលផ្ទេរមកពីក្លិប Leeds United ជាមួយកិច្ចសន្យារយៈពេល ៥ឆ្នាំ។

Georginio Rutter មានវ័យ ២២ឆ្នាំ ជាកីឡាករឆ្នើមដែលអាចលេងបាននៅ ២ទម្រង់ទាំង (ខ្សែបម្រើប្រយុទ្ធ និងប្រយុទ្ធជួរមុខ) ធ្លាប់បានបង្ហាញខ្លួនជាមួយក្លិប Leeds United ចំនួន ៦៦ប្រកួត រកបាន ៨គ្រាប់ បន្ទាប់ផ្ទេរមកពីក្លិប Hoffenheim កាលពីខែមករា ឆ្នាំ២០២៣ ជាមួយតម្លៃកំណត់ត្រារបស់ក្លិបប្រមាណ ៣៦លានផោនផងដែរ។

សូមជម្រាបផងថា ស្ថិតក្នុងការប្រកួតប្រជែងលីគអង់គ្លេស Premier League 2024-25 ក្លិប Brighton & Hove Albion បានឡើងឈរនាំមុខកំពូលតារាងក្រោយរកបាន ៣ពិន្ទុពីការយកឈ្នះក្រុម Everton ៣-០ ក្នុងសប្តាហ៍ដំបូង ដែលស្ថិតក្នុងការដឹកនាំរបស់លោក Fabian Hurzeler ដែលគ្រូបង្វឹកក្មេងជាងគេនៅក្នុងលីគរដូវកាលនេះផងដែរ ៕