(បរទេស)៖ Apple បានដើរចេញពីទីផ្សារប្រទេសចិន និងបានចាប់យកទីផ្សារឥណ្ឌាសម្រាប់ជាមូលដ្ឋានក្នុងការឈរជើង ផលិត iPhone ប៉ុន្តែ Foxconn គឺជាអ្នកផ្គត់ផ្គង់ និងទទួលផលិត iPhone ឱ្យ Apple ដដែលនៅក្នុងប្រទេសឥណ្ឌា។ យោងតាមការចេញផ្សាយរបស់សារព័ត៌មាន Business Standard នៅថ្ងៃទី២២ ខែសីហា ឆ្នាំ២០២៤ បានបញ្ជាក់ថា Foxconn បានចាប់ផ្ដើមផលិត iPhone 16 Pro និង Pro Max នៅក្នុងប្រទេសឥណ្ឌាហើយ។
ប្រភពខាងលើបានបន្ថែមទៀតថា សម្រាប់ iPhone 16 Pro និង Pro Max ដែលផលិតនៅក្នុងប្រទេសឥណ្ឌានេះ អាចនឹងមានតម្លៃទាបជាងមុនប្រមាណ ១០ភាគរយ ហើយវាក៏ជាជម្រើសថ្មីសម្រាប់ Apple ផងដែរថា ដែលផលិត iPhone នៅក្រៅប្រទេសចិន បន្ទាប់ពីជោគជ័យទៅលើម៉ូដែលជំនាន់មុន។
សារពព័ត៌មាន Bloomberg បានចេញផ្សាយថា Foxconn និងដៃគូរសហការនៅក្នុងប្រទេសឥណ្ឌាគឺ Tamil Nadu បានប្រមូលកម្មកររាប់រយនាក់មកធ្វើការការបណ្តុះបណ្តាលទៅលើសង្វាក់ផលិតកម្ម iPhone 16 Pro និង Pro Max ដោយក្នុងនោះក៏មានកម្មករជំនាញៗជាច្រើនរូបចូលរួមវគ្គនេះផងដែរ ដើម្បីធ្វើជាប្រធានក្រុម ឬប្រធានផ្នែកក្នុងការដឹកនាំសង្វាក់ផលិតកម្ម៕