(ភ្នំពេញ)៖ ABA ដែលជាធនាគារធំជាងគេនៅប្រទេសកម្ពុជា មានមោទនភាព ទទួលបានពានរង្វាន់យុទ្ធនាការ ទីផ្សារឆ្នើមប្រចាំឆ្នាំ 2024 ពីស្ថាប័ន CMO Asia Awards ក្នុងកិច្ចការទីផ្សារ និងកិច្ចផ្សព្វផ្សាយរបស់ ABA នាឱកាសបុណ្យចូលឆ្នាំខ្មែរ។ សមិទ្ធផលនេះបានបង្ហាញអំពីយុទ្ធសាស្ត្រប្រកបដោយអានុភាព និងភាពច្នៃប្រឌិតខ្ពស់របស់ ធនាគារ ABA ដែលរំលេចឲ្យឃើញផងដែរពីការស្រឡាញ់ និងឲ្យតម្លៃខ្ពស់របស់ ABA ចំពោះវប្បធម៌ខ្មែរ ហើយបានក្លាយជាចលករជំរុញទឹកចិត្តអតិថិជនឲ្យចូលរួមផ្សព្វផ្សាយ និងសាទរប្រពៃណីវប្បធម៌ជាតិជាមួយធនាគារផងដែរ។
ABA បានចាប់ផ្តើម «យុទ្ធនាការបុណ្យចូលឆ្នាំខ្មែរ» ក្នុងឆ្នាំនេះ ដើម្បីប្រារព្ធទំនៀមទម្លាប់ប្រពៃណីវប្បធម៌ខ្មែរដ៏ផូរផង់។ យុទ្ធនាការនេះក៏បានឆ្លុះបញ្ចាំងពីប្រសិទ្ធភាពនៃយុទ្ធសាស្ត្រទីផ្សារឌីជីថលក្នុងគោលបំណងពង្រឹងទំនាក់ទំនងអតិថិជនកាន់តែប្រសើរ តាមរយៈមាតិកាមានគុណភាព និងគុណតម្លៃរំលេចដោយទិដ្ឋភាពវប្បធម៌ប្រពៃណីជាតិ ក៏ដូចជាបង្ហាញពីការប្តេជ្ញាចិត្តរបស់ធនាគារក្នុងការបម្រើសេវាដែលងាយស្រួលប្រើប្រាស់សម្រាប់អតិថិជន។
ការផ្សព្វផ្សាយអំពីពិធីបុណ្យចូលឆ្នាំខ្មែរនៅក្នុង ABA Mobile កម្មវិធីសេវាធនាគារតាមទូរស័ព្ទដ៏ទំនើប ABA Mobile ជាមួយកំណែ 5.0 ចុងក្រោយបំផុត បានណែនាំនូវម៉ូដរចនា Khmer New Year ថ្មីដំបូងគេតែមួយគត់ ដែលមិនមាននៅលើអេបដទៃ ដោយរំលេចតម្លៃវប្បធម៌ប្រពៃណីខ្មែរយើង ផ្ទៃភ្លឺ និងផ្ទៃងងឹត។ ប៊ូតុងនីមួយៗរបស់អេប ក៏ត្រូវបានរចនាឡើងដោយរំលេច មរតកវប្បធម៌សម្បូរបែបរបស់ពិធីចូលឆ្នាំខ្មែរ ដែលបន្ថែមសោភណសម្ផស្សយ៉ាងល្អប្រណីត។
ជាលទ្ធផលយុទ្ធនាការនេះទទួលបានជោគជ័យគួរឲ្យកត់សម្គាល់ ដោយអតិថិជនជាង ១លាននាក់ បានជ្រើសយកម៉ូដរចនា បុណ្យចូលឆ្នាំមកប្រើប្រាស់ ដែលបង្ហាញឲ្យឃើញពីទិដ្ឋភាពរួមបញ្ចូលគ្នា រវាងបច្ចេកវិទ្យា និងវប្បធម៌ប្រពៃណី។
តាមរយៈការជំរុញបទពិសោធចម្រុះរសជាតិនេះ អតិថិជន ABA អាចធ្វើប្រតិបត្តិការសេវាធនាគារផង និងចូលរួមជាចំណែកលើកស្ទួយវប្បធម៌ប្រពៃណីខ្មែរផង ដែលដើរតួយ៉ាងសំខាន់ ក្នុងទាក់ទាញឲ្យមានការចូលរួមពីណាក់អតិថិជន ជាមួយការប្រើប្រាស់សេវាពោរពេញដោយការស្រឡាញ់ពេញចិត្ត។
ចំនួនប្រតិបត្តិការក្នុង ផ្នែកសេវាកម្ម របស់អេប ABA មានការកើនឡើងគួរឲ្យកត់សម្គាល់ ដែលបង្ហាញឲ្យឃើញថា អតិថិជនមិនត្រឹមតែចូលរួមប្រើប្រាស់ម៉ូដរចនាថ្មីប៉ុណ្ណោះទេ ពួកគាត់ថែមទាំងប្រើប្រាស់សេវាធនាគាររបស់ខ្លួនកាន់តែញឹកញាប់ជាងមុនផងដែរ។
ការប្រើប្រាស់កាន់តែសកម្មនេះ ក៏នាំឲ្យមានកំណើនប្រាក់ចំណូលសម្រាប់អាជីវកម្ម និងកំណើនប្រតិបត្តិការដល់ធនាគារផងដែរ។
ការផ្សព្វផ្សាយអំពីពិធីបុណ្យចូលឆ្នាំខ្មែរ លើបណ្តាញសង្គម
ABA ក៏បានបង្កើតនូវយុទ្ធនាការផ្សព្វផ្សាយតាមបណ្តាញសង្គមដ៏ទូលំទូលាយ ដោយបញ្ចេញមាតិកាទាក់ទាញជាច្រើនដូចជា រូបភាព វីដេអូ និងភាពយន្តខ្លី ដែលរំលេចនូវទំនៀមទម្លាប់ក្នុងការប្រារព្ធពិធីបុណ្យចូលឆ្នាំខ្មែរ និងភាពងាយស្រួលក្នុងការប្រើប្រាស់សេវាកម្មក្នុងអេប ABA Mobile។
យុទ្ធនាការនេះក៏បានចូលរួមចំណែកដោយ សិល្បករ សិល្បការនី បុគ្គលនិមិត្តរូបវប្បធម៌ប្រពៃណី និងអ្នកបណ្ដាញសង្គមឆ្នើមៗជាច្រើនរូបនៅក្នុងប្រទេស ដើម្បីបង្កើតមាតិកាគួរល្អៗពេញដោយគុណតម្លៃ និងបណ្តុះគំនិតរូមគ្នាជាសហគមន៍តែមួយ។
ជាមួយគ្នានេះក៏មានការទស្សនាភាពយន្តខ្លីរបស់ ABA រហូតដល់ជាង១លានដង និងចូលរួមចែករំលែកបន្តចំនួនជាង 10,000ដង ក្នុងរយៈពេលមិនដល់ ២៤ម៉ោងផង ដោយមិនមានការប៊ូស ដែលនេះបង្ហាញពីជោគជ័យដ៏ធំរបស់យុទ្ធនាការ។
ការទទួលបានពានរង្វាន់ឆ្នើមពីស្ថាប័ន CMO Asia Awards នេះ ឆ្លុះបង្ហាញពីការប្តេជ្ញាចិត្តរបស់ ABA ក្នុងការប្រតិបត្តិប្រកបដោយឧត្តមភាព ការដាក់បញ្ចូលពិធីបុណ្យចូលឆ្នាំខ្មែរទៅក្នុងកិច្ចការទីផ្សារ ផ្សព្វផ្សាយកិត្តិនាម និងធានាបាននូវការស្រឡាញ់ពេញចិត្តពីសំណាក់អតិថិជន៕