(ឡុងដ៏)៖ ខ្សែបម្រើពាកអាវលេខ៧ របស់ក្លិប Manchester United កីឡាករ Mason Mount នឹងត្រូវដេកសម្រាកព្យាបាលរបួសសរសៃពួរ ជាមួយការអវត្តមានពីការប្រកួតមានរយៈពេលជាង ១ខែ។ នេះបើតាមប្រភពពី BBC បានឱ្យដឹងនាថ្ងៃទី៣០ ខែសីហា ឆ្នាំ២០២៤ ។

កីឡាករមានវ័យ ២៥ឆ្នាំរូបនេះ បានជួបបញ្ហារបួសហើយត្រូវបានប្តូរចេញនៅពាក់កណ្តាលការប្រកួតក្នុងលីគ Premier League កាលពីចុងសប្តាហ៍មុន ជាមួយការលេងទល់នឹងក្រុម Brighton & Hove Albion ដែលទើបលេងបាន ៣ប្រកួតឱ្យក្លិបក្នុងរដូវកាលថ្មីនេះ ។

របាយការណ៍បានឱ្យដឹងថា Mason Mount បានរងរបួសសរសៃពួរ ដែលមានន័យថារូបគេនឹងខកខានរយៈពេល ៤ទៅ ៥សប្តាហ៍ខាងមុខ និងការចាប់ផ្តើមយុទ្ធនាការលេងពាន Europa League របស់ក្លិប Man United នៅខែក្រោយ ។

រំលឹកផងថា Mount បានផ្លាស់មកកាន់កីឡដ្ឋាន Old Trafford ពីក្លិប Chelsea ក្នុងកិច្ចសន្យាតម្លៃ ៦០ លានផោនកាលពីរដូវក្តៅមុន ប៉ុន្តែការចាប់ផ្តើម ក៏បានរារាំងដោយសាបញ្ហារបួសផងដែរ ដោយរូបគេលេងបានតែ ១៤ប្រកួត នៅលីគ Premier League រដូវកាលមុន​ រកបានតែ ១គ្រាប់ប៉ុណ្ណោះ ៕